Холбооны улсын бүрэлдэхүүнд багтдаг орон нутгийн удирдагчидтай Мягмар гарагийн шөнө дунд хүртэл явуулсан яриа хэлэлцээний үр дүнд Германы канцлер Олаф Шольц цагаачлалын бодлогоо чангатгах тохиролцоонд хүрсэн байна.

Тухайлбал цагаачдад хуваарилдаг нийгмийн халамжийн хэмжээг бууруулж, хэмнэсэн хөрөнгөө өөрийн иргэдэд зориулахаар болжээ.

Хэдийгээр эвслийн засгийн газрын бүрэлдэхүүнд ордог Ногоон намынхан цагаачдад үзүүлдэг нийгмийн халамжийг бууруулахыг эсэргүүцсэн ч энэхүү улс төрийн зөвшилцлийг Герман улсын хувьд “түүхэн мөч” гэж Шольц тодорхойлсон байна.

“Энэ бол нийгмийн зөрчлийг улам нэмэгдүүлж, цагаачдыг нийгэмшүүлэх үйл явцыг улам хүндрүүлэх шийдвэр юм” гэж Ногоон намын цагаачлалын мэргэжилтэн Юлиан Палке хэвлэлд шүүмжлэн ярьжээ.

Цагаачлалын асуудал Германы эрх баригчдын хувьд дахин томоохон сорилт болоод байгаа. 2015 онд канцлер Меркелийн засаглалын үед тус улс нэг сая гаруй дүрвэгчийг Ойрх Дорнодоос хүлээн авсан юм.

Энэ оны нэгдүгээр сараас есдүгээр сарыг хүртэлх хугацаанд Германд оршин суух хүсэлт гаргасан цагаачдын тоо өмнөх оны мөн үеэс 73 хувиар өсөж, 250,000 гаруйд хүрсэн байна.

Үүнээс гадна Оросын эзлэн түрэмгийлэх дайны улмаас нэг сая гаруй дүрвэгч Украинаас Германд ирээд байгаа.

Германд дүрвэж ирэгсдийн дийлэнх хэсэг Сири, Афганистан, Турк улсаас гаралтай юм.

Берлиний эрх баригчдын шийдвэр нь Итали улс өөрийн газар нутагт далайгаар ирсэн дүрвэгчдийг Албани улсад байрлуулах гэрээ байгуулсны маргааш гарч байна.

Энэ тохиролцоог Италийн ерөнхий сайд Жоржиа Мелони “Европын Холбооны гишүүн болон гишүүн бус улсуудын хамтын ажиллагааны загвар” болох ач холбогдолтойг хэвлэлд ярьжээ.

Итали, Албанийн удирдагчид

Гэвч дүрвэгчдийн эрхийг хамгаалдаг байгууллагууд Итали, Албанийн удирдагчдын байгуулсан гэрээг шүүмжилж байна.

“Италийн эрх баригчдын шийдвэр нь дүрвэгчдийг хүлээн авч, хүн ёсоор хандахын оронд тэднийг Европт хүрэхээс сэргийлэхэд гол нь чиглэж байна” гэж Олон Улсын Аврах Хорооны Европ дахь салбараас мэдэгджээ.

“Хил Хязгааргүй Эмч Нар” олон улсын байгууллага уг тохиролцоог Европын Холбооны хувьд зорилгоосоо нэг алхам ухарсан хэрэг гэж дүгнэж байна.

“Тохиролцооны зорилго нь дүрвэн ирэгсдийг цөөрүүлэх нөхцөлийг бүрдүүлэхийн оронд Европын газар нутагт хөл тавихаас урьдчилан сэргийлэх, ингэснээр олон улсын хууль тогтоомж, Европын конвенцод заасан хамгаалах, аврах үүргээсээ татгалзсан явдал боллоо” гэж тус мэдэгдэлд өгүүлжээ.

Гэрээний хүрээнд Африк тивээс Газар дундын тэнгисийг гатлан Италийн нутаг дэвсгэрт ирсэн 36,000 хүртэл тооны дүрвэгчийг Албани улсын нутаг дэвсгэрт түр байрлуулахаар болж байна.

Итали улсад энэ онд ирсэн дүрвэгчдийн тоо өнгөрсөн оны мөн үетэй харьцуулахад 65 хувиар өсөөд байгаа.

Ерөнхий сайд Мелони нутаг дэвсгэрт нь ирж буй цагаачдын тоог бууруулахад ийм тохиролцоо зайлшгүй шаардлагатай гэж үзэж байна.

Мелони ийм гэрээ байгуулах гэж байгаагаа батлагдахаас нь ердөө нэг цагийн өмнө Европын Холбооны удирдлагад мэдэгджээ.

Үүнээс өмнө Их Британийн засгийн газар нутаг дэвсгэрт нь ирсэн дүрвэгчдийг Африк тивийн Руанда улсын нутагт түр байрлуулах төлөвлөгөө боловсруулсан нь хууль эрх зүйн олон асуудалтай тулгараад байгаа.

Германы эрх баригчид бас дүрвэгсдэд орогнол олгох үйл явцыг Европын Холбооны гадна зохион байгуулах боломжийг судалж байгаа ч хараахан шийдвэр гаргахад бэлэн бус байгаа тухай канцлер Шольц мэдээлсэн байна.

Эх сурвалж: The Guardian