Европын Холбооны гүйцэтгэх засаглалын тэргүүн тодорхой нөхцөлүүд хангагдсан тохиолдолд Украин улсыг гишүүнээр элсүүлэх яриа хэлэлцээг эхлүүлэх зөвлөмжийг өчигдөр гаргажээ.

Тухайлбал авлигыг таслан зогсоох, Европын Холбооны стандартын дагуу лоббины тухай хууль батлуулах, үндэстний цөөнхийн хамгаалалтыг бэхжүүлэх зэрэг үлдсэн нөхцөлүүдийг хангасан тохиолдолд гишүүнээр элсүүлэх яриа хэлэлцээг эхлүүлэхэд бэлэн байгаагаа илэрхийлсэн байна.

“Энэ бол Украиныг гишүүнээр элсүүлсэн хүчирхэг Европын Холбоо бий болох замыг нээсэн түүхэн алхам юм” гэж Володимир Зеленский сошиал хуудсандаа талархан бичээд үлдсэн нөхцөл шаардлагуудыг биелүүлэхийн төлөө шаргуу ажиллахаа амлажээ.

Ирэх сарын дундуур Европын Холбооны гишүүн 27 улсын удирдагчид уулзахдаа гүйцэтгэх засаглалын гаргасан зөвлөмжийг батлах эсэхийг эцэслэн шийдвэрлэх юм.

Гишүүн орнууд бүрэн санал нэгдсэн тохиолдолд шийдвэр гарах бөгөөд эдгээрээс ганцхан Унгар улс саад болох магадлалтай байна.

Хэрвээ зөвлөмж батлагдвал гишүүнчлэлийн яриа хэлэлцээ ирэх онд эхлэх бөгөөд энэ үйл явц хэдэн жилийн турш үргэлжилдэг.

Мөн Оросын эзлэн түрэмгийлэх дайн Украины гишүүнээр элсэх үйл явцад саад учруулж магадгүй юм.

“Оросын өдөөсөн дайны улмаас Украин улс асар их бэрхшээл туулж, гарз хохиролтой тулгарсаар байгаа. Хэдийгээр өөрийн оршин тогтнолын төлөө тулалдаж байгаа ч украинчууд улс орондоо гүнзгий шинэчлэл хийсээр байна” гэж Европын Комиссын ерөнхийлөгч Урсула фон дер Ляйен өчигдөр мэдэгджээ.

Түүний тэргүүлсэн хорооноос Лхагва гарагт гаргасан тайланд өгүүлснээр Украин улс одоо долоон шалгуур нөхцөлийн дөрвийг нь хангаад байгаа гэнэ. Ирэх оны гуравдугаар сард Киевийн эрх баригчдын гаргасан ахиц дэвшлийг дахин үнэлэх юм байна.

Унгарын ерөнхий сайд Виктор Орбаны зөвлөх өчигдөр хэлэхдээ Киевийн засгийн газар үндэсний цөөнхийн талаарх хуулиа шинэчлэхгүй бол Украины гишүүнчлэлийг дэмжихгүйг мэдэгджээ.

Ялангуяа үндэсний цөөнхийн боловсролын асуудлыг шинэчлэх шаардлагатай гэж мэдэгдсэн байна.

Украины баруун хязгаарт унгар үндэстний цөөнх оршин суудаг бөгөөд эдгээр иргэдийн эрхийн асуудал Киев, Будапештын эрх баригчдын дунд маргаантай байдаг.

Европын Комисс өчигдөр бас Украины жижиг хөрш Молдов улстай холбоотой ижил зөвлөмж гаргасан байна.

“Молдов улс Европын Холбоонд нэгдэх зам дээр тууштай зогсож байгаа бөгөөд бид энэ зорилгод хүрэхийн тулд шаргуу ажиллах болно” гэж тус улсын ерөнхийлөгч Майя Санду мэдэгджээ.

Украин, Молдовоос гадна Гүрж улс тодорхой шалгуур нөхцөлүүдийг хангасан тохиолдолд Европын Холбооны гишүүнд горилогчийн статус авах боломжтойг Брюсселийн эрх баригчид өчигдөр мэдэгдсэн байна.

450 сая хүн амтай дэлхийн баян чинээлэг бүс нутгуудын нэгд тооцогддог Европын Холбоо хамгийн сүүлд 2013 онд Хорват улсыг гишүүнээрээ элсүүлж байв. Харин 2020 онд Их Британи тус холбооноос гарсан анхны улс болсон нь дэлхийн хоёрдугаар дайны дараах Европын интеграцчилалд томоохон бэрхшээл учруулсан юм.

Мөн Украинд явуулж Оросын эзлэн түрэмгийлэх дайн Европын Холбооны нэр хүнд, эв нэгдэлд шинэ саад тотгор болж байгаа.

“Манай Холбооны өргөжин тэлэлт нь түүхийн дуудлага юм. Үүнд эдийн засаг, геополитикийн хүчтэй утга агуулга бий. Өмнөх тэлэлтүүд нь элссэн улс орнууддаа болон Европын Холбоонд асар их ашиг тусыг үзүүлсэн билээ. Бид бүгд ялах болно” гэж фон дер Ляйен өчигдөр хэлжээ.

Турк улс 2005 онд Европын Холбоонд гишүүнээр элсэх яриа хэлэлцээг эхлүүлсэн ч нөхцөл шаардлагыг нь хангаагүйн улмаас сүүлийн жилүүдэд зогсонги байдалд ороод байна.

Европын Комисс сүүлийн тайландаа Турк улсад ардчилсан институцүүдийн үйл ажиллагаанд ноцтой алдаа доголдол байгаа болон хүний эрхийн стандарт буурч, авлигатай тэмцэхэд ахиц дэвшил гараагүй тухай дурджээ.

Эх сурвалж: Reuters