Израилийн арми Газын зурваст Хамасын эсрэг явуулж буй байлдааны ажиллагаагаа өдөр бүр дөрвөн цагийн хугацаатай завсарлаж байхаар болсныг Цагаан ордон мэдээллээ.
Энэ нь энгийн номхон иргэдийг тулааны талбараас дүрвэхэд зориулсан хугацаа юм байна.
АНУ-ын ерөнхийлөгч Жо Байден ийм хүмүүнлэг ёсны завсарлагын саналыг Даваа гарагт Израилийн ерөнхий сайд Бенжамин Нетаньяхутай утсаар ярихдаа тавьж байсан нь ийнхүү Пүрэв гарагаас эхлэн хэрэгжихээр болжээ.
Байден анх бүтэн гурван өдөр завсарлаж, барьцааны хүмүүсийг шилжүүлж авах яриа хэлэлцээ эхлүүлэх санал тавьсныг Израилийн тал зөвшөөрөөгүй юм байна.
Өчигдөр сэтгүүлчид энэ талаар асуухад Байден “Тиймээ. Би үүнээс илүү урт завсарлагын санал анх тавьсан” гэж хариулжээ.
Одоогийн нөхцөл байдалд урт хугацаагаар гал зогсоох боломжгүй байгааг ойлголцсон, хүмүүнлэгийн завсарлагыг Израилийн тал хүлээн зөвшөөрөхөд төсөөлснөөс нь урт хугацаа орсныг Байден энэ үеэр тайлбарласан байна.
Израилийн эрх баригчид өдөр тутмын завсарлага эхлэх цагийг хамгийн богинодоо гурван цагийн өмнө нийтэд зарлаж байх үүрэг хүлээжээ.
Хамас-Израилийн тулаан ид өрнөж буй Газын зурвасын хойд хэсгээс иргэд өмнөд хэсэг рүү олон мянгаараа дүрвэж байгаа. Сүүлийн өдрүүдэд тулаан хэд хэдэн удаа богино хугацаагаар завсарлаж байсан бол одоо ийм завсарлага албан ёсны болж баталгаажиж байна.
Өдөр тутмын завсарлага нь бас Хамасын барьцаанд байгаа 240 орчим хүнийг шилжүүлж авахад чухал ач холбогдолтойг Цагаан ордон мэдэгджээ.
Тэдгээрийн дотор 10 хүртэл тооны АНУ-ын харьяат иргэн байгаа юм.
Олон улсын хамтын нийгэмлэг Газын зурваст дайн эхэлснээс хойш урт хугацаагаар гал зогсоохыг Израилийн талд уриалсан ч хүлээж авахгүй байгаа.
Хамас зэвсэгт байгууллагыг бүрэн устгаж, барьцааны хүмүүсээ суллах хүртэл гал зогсоох ямар ч боломжгүй гэж Израилийн тал үзэж байна.
Эх сурвалж: AFP