Нэг жил орчим хугацааны дараа АНУ, БНХАУ-ын төрийн тэргүүн нар Сан-Франциско хотод уулзлаа.
БНХАУ-ын дарга Ши Жиньпин зургаан жилийн дараа АНУ-ын нутаг дэвсгэрт хөл тавихдаа APEC-ийн жил тутмын дээд чуулганд оролцохын зэрэгцээ ерөнхийлөгч Жо Байдентай уулзсан нь энэ юм.
Тэдний уулзалт Сан-Франциско хотоос өмнө зүгт 40 км зайтай оршдог түүхэн байгууламжид хэдэн цагийн турш үргэлжилжээ.
Уулзалтын эхэнд хоёр ерөнхийлөгч хэвлэлд нээлттэй ярилцаж, дараа нь хэд хэдэн ээлжийн хаалттай яриа хэлэлцээ, үдийн зоогоор үргэлжилсэн байна.
Уулзалтын завсарлагаар Ши Жиньпин, Жо Байден нар цэцэрлэгт хамтдаа салхилсан юм.
Уулзалтын үр дүнгийн талаар хэвлэлийн хурлыг АНУ-ын ерөнхийлөгч Улаанбаатарын цагаар өнөөдөр 08:00 цагийн үед хийхээр төлөвлөжээ.
Тэрбээр цэцэрлэгт салхилж байхдаа яриа хэлэлцээ амжилттай үргэлжилж байгааг хэлсэн бол дараа нь сошиал хуудсандаа “Би өнөөдөр ерөнхийлөгч Шитэй хийсэн уулзалтаа өндрөөр үнэлж байна. Учир нь бид бие биеэ ойлголцох нь хамгийн чухал зүйл гэж би бодож байна. Бидний хамтын манлайллыг шаардсан дэлхий нийтийн эгзэгтэй сорилтууд байгаа. Өнөөдөр бид бодитой ахиц дэвшил гаргалаа” гэж бичсэн байна.
Уулзалтын эхэнд Ши Жиньпин АНУ-ын ерөнхийлөгчид “Хоёр улс амжилтад хүрэхэд дэлхий гараг хангалттай том” гэж хэлсэн юм.
Хариуд нь Жо Байден түүнд “Та бид хоёр бие биедээ ямар ч буруу ойлголт төрүүлэхгүй, төөрөгдөл үүсгэхгүйн тулд нүүр тулан ярилцаж, тодорхой ойлголцох нь хамгийн чухал гэж бодож байна. Өрсөлдөөн нь зөрчилд хүргэхгүй байхад бид анхаарал тавих ёстой” гэж хэлжээ.
Хятадын төрийн тэргүүн дараа нь “Хятад, АНУ-ын харилцаа хэзээ ч саадгүй байгаагүй, гэхдээ урагшилсаар байна. Ийм хэмжээний хоёр улсын хувьд бие биеэсээ нүүр буруулах нь байж боломгүй сонголт юм. Нэг тал нөгөөдөө яаж өөрчлөгдөхийг заах нь бодитой бус, мөргөлдөөн, сөргөлдөөн аль аль талдаа тэвчих аргагүй үр дагавартай” гэж хэлсэн байна.
Лхагва гарагийн орой Ши Жиньпин АНУ-ын бизнесийн төлөөлөгчидтэй оройн зоог барихаар төлөвлөжээ. Нэг суудал нь $2,000-ын үнэтэй энэ арга хэмжээний үеэр тэр Хятад улс хөрөнгө оруулагчдад таатай, нээлттэй хэвээр байгааг батлан илэрхийлсэн илтгэл тавих юм байна.
Эх сурвалж: CNN
