АНУ-ын цахилгаан хөдөлгүүрт автомашин үйлдвэрлэгч Тесла компани удаан хүлээлгэсэн, сүр дуулиантай Cybertruck пикап загварын автомашинаа өнөөдрөөс захиалагчдад нь хүргэж эхэлж байна.
Cybertruck бол тус компанийн дөрвөн жилийн дараа гаргаж байгаа шинэ бүтээгдэхүүн юм.
Цахилгаан автомашин үйлдвэрлэгчдийн өрсөлдөөн ид эрчимжсэн цаг үед зах зээлд гарч байгаагаараа өмнөх Model 3, Model Y загваруудаас онцлог болж байна.
Cybertruck загвар зах зээлд гарснаасаа хойш 12-18 сарын дараа Теслад бодитой орлого оруулж эхлэхийг Илон Маск өнгөрсөн сард хөрөнгө оруулагчдад анхааруулж байв.
Тэрбээр “Бид Cybertruck-аар өөрсдийн булшийг ухаж байгаа юм” гэж тухайн үед хэлсэн нь ямар эрсдэлтэй бүтээгдэхүүн болохыг илтгэж байна.
2019 онд анх танилцуулахдаа Cybertruck-ийн үнэ $40,000-аас эхлэхийг Маск зарлаж байсан.
Гэхдээ өнгөрсөн хугацаанд түүхий эдийн үнэ нэлээд өссөн тул өөрчлөгдөх төлөвтэй байна. Эцсийн үнийг өнөөдөр Тесла зарлах гэнэ.
Morningstar компанийн стратегич Сет Голдстайн шинэ загварын үнийг $50,000-$70,000 хооронд хүрэх таамаг дэвшүүлжээ.
Cybertruck-ийн үйлдвэрлэл 2025 оноос жигдэрч, жилд 250,000 орчмыг зах зээлд нийлүүлдэг болно гэж Илон Маск сүүлд мэдэгдсэн.
Гэхдээ зах зээлд нийлүүлж эхлэх хугацаа нь анх зарласнаасаа хоёр жилээр хойшилсныг тооцвол түүний хэлсэнд итгэхэд хэцүү юм.
Шинэ технологи, шинэ дизайн ашиглаж буй тул бөөнөөр үйлдвэрлэхэд асар их бэрхшээлтэй тулгарч байгаагаа Маск тайлбарлаж байв.
Cybertruck загварын уран зөгнөлийн гэмээр өвөрмөц хийц дизайн, уламжлалт бус материал зэрэг нь үйлдвэрлэлийг нэлээд хүндрүүлж байх магадлалтай гэж ажиглагчид үзэж байна.
Өнгөрсөн дөрвөн жилийн хугацаанд нэг сая гаруй хүн Cybertruck автомашиныг захиалж, $100-ын урьдчилгаа төлжээ.
Эх сурвалж: Reuters
