Газын зурваст Хамас зэвсэгт байгууллагын ашигладаг газар доогуурх хонгилуудад далайн ус шахах томоохон системийг Израилийн арми угсарч дууссан тухай АНУ-ын хэвлэл өчигдөр албаны эх сурвалжаас уламжлан мэдээлжээ.

Арваннэгдүгээр сарын дундуур хамгийн цөөндөө таван ус шахагч бүхий ийм системийг Газын зурвасыг хойд хагаст байгуулж дууссан бөгөөд уг систем нь цагт хэдэн мянган шоо метр ус шахах чадалтай тухай The Wall Street Journal мэдээлсэн юм.

Хэрвээ уг системийг ашиглавал Хамасын нуувч хонгилууд хэдхэн хоногийн дотор усаар дүүрэх юм байна.

Гэхдээ Израилийн арми барьцааны хүмүүсийг суллаж дуусаагүй байхдаа энэ системийг ашиглах эсэх нь эргэлзээтэй байгаа гэнэ.

Бас нэг хувилбар нь Израилийн зэвсэгт хүчин Газын зурваст байлдааны ажиллагаагаа дуусгаж, Хамас байгууллагыг устгасныхаа дараа уг хонгилын системийг дахин ашиглагдахгүй болгохоор төлөвлөж байх магадлалтай юм.

Энэ мэдээллийн талаар Израилийн зэвсэгт хүчний (IDF) хэвлэлийн төлөөлөгчөөс лавлахад шууд хариулахаас татгалзсан ч “Хамасын террорист ажиллагаа явуулах чадварыг устгахын тулд IDF зэр зэвсгийн болон технологийн төрөл бүрийн арга хэрэгслийг ашиглаж байгаа” гэж мэдэгджээ.

Израилийн арми дайны эхэн үед Газын зурвасын хойд хагаст байлдааны ажиллагаа явуулсан бол одоо өмнөд хагаст шилжээд байна.

Даваа гарагт Израилийн танкууд, хуягт тээвэрлэгчид, түрэгч машинууд өмнөд Газын гол хот Хан Юнист орж иржээ.

Энэ үеэрээ тус хотын хойд болон зүүн хэсэг удахгүй тулааны талбар болох тул энгийн иргэдэд нүүхийг зөвлөсөн байна.

Гэвч өнгөрсөн хоёр сар орчим хугацаанд хойд Газаас дүрвэсэн иргэдэд цааш нүүх газар үлдээгүйг хүний эрхийн байгууллагууд анхааруулжээ.

“Газад аюулгүй газар алга, нүүх газар ч үлдсэнгүй” гэж Палестины газар нутаг дахь НҮБ-ын хүмүүнлэгийн тусламжийн зохицуулагч Линн Хастингс мэдэгдсэн байна.

Аравдугаар сарын 7-ны өдөр Палестины Хамас зэвсэгт байгууллага Израилийн нутаг дэвсгэрт халдан довтлохдоо энгийн иргэд голдуу 1,200 орчим хүний амийг хөнөөж, 240 орчим хүнийг барьцаалсан юм.

Өнгөрсөн хоёр сарын хугацаанд Израилийн арми Хамасын түшиц газар болох Газын зурваст байлдааны ажиллагаа явуулах үеэр нийтдээ 15,900 орчим палестин хүний амь үрэгдээд байна.

Тэдгээрийн 70 орчим хувь нь эмэгтэйчүүд, хүүхдүүд болохыг Газын албаны эх сурвалж мэдээлжээ.

Эх сурвалж: Reuters