Оросын сөрөг хүчний улс төрч Алексей Навальный өнгөрсөн оны дундаас хойш хоригдож байгаа шорондоо байхгүй байгааг түүний хамтрагчид Даваа гарагт мэдээлжээ.
Энэ оны наймдугаар сард Оросын шүүх түүнд өмнөх 11.5 жилийн хорих ял дээр нь нэмээд 19 жилийн хорих ял оноосон юм.
Нэмэлт ялын дагуу түүнийг тусгай дэглэмтэй хорих ангид шилжүүлэх ёстой байлаа.
Өргөн уудам нутагтай Орос улсад хоригдлыг шорон хооронд шилжүүлэхэд олон хоног шаарддаг бөгөөд хүрэх газраа очсон хойно л хаана хоригдсон нь тодорхой болдог.
Навальныйг шилжүүлэх ажиллагаа эхэлсэн эсэх талаар албан ёсны мэдээлэл гараагүй байна.
Москва хотоос зүүн зүгт 235 км зайтай оршдог Мелеховогийн ИК-6 шоронгийн хоригдлууд дунд Навальный байхгүй байгаа талаар мэдээлэл авснаа түүний хэвлэлийн төлөөлөгч Кира Ярмыш өчигдөр зарлажээ.
“Түүнийг хаашаа авч явсан талаар ямар ч мэдээлэл өгөхгүй байна” гэж тэр сошиал хуудсандаа бичсэн байна.
“Түүнийг яаралтай суллах ёстой. Тэр анхнаасаа шоронд хоригдох ёсгүй байсан юм” гэж Цагаан ордны үндэсний аюулгүй байдлын зөвлөлийн хэвлэлийн төлөөлөгч Жон Кирби сүүлд Вашингтонд болсон хэвлэлийн хурлын үеэр мэдэгджээ.
АНУ-ын засаг захиргаа Навальныйн хувь заяанд санаа зовж байгааг тэр энэ үеэр бас илэрхийлсэн байна.
Навальный сураггүй алга болсон нь ОХУ-ын ерөнхийлөгчийн сонгуулийн үйл ажиллагааны эхлэлтэй давхцаж байгаа юм.
Баасан гарагт ОХУ-ын ерөнхийлөгч Владимир Путин дахин сонгуульд өрсөлдөх болсноо зарласан.
Навальныйн туслах Леонид Волков цаг хугацаа ингэж давхацсан нь санаандгүй зүйл биш гэж үзэж байна.
“Путиний хувьд энэ сонгуулийн гол өрсөлдөгч нь хэн болохыг мэдэж байгаа. Тиймээс тэр Навальныйн дуу хоолойг нийтэд сонсгохыг хүсэхгүй байгаа нь тодорхой” гэж тэр ярьжээ.
Навальныйн бас нэг хамтран зүтгэгч Любовь Соболь “Бид түүний эрүүл мэндийн байдалд санаа зовж, одоо хаана байгааг нь тогтоохыг хичээж байна. Гэхдээ мэдэх боломж алга” гэж ярьсан байна.
Өнгөрсөн хугацаанд Навальный өмгөөлөгчөөрөө дамжуулан шоронгоос байр сууриа илэрхийлсээр байсан юм.
Аравдугаар сард Оросын эрх баригчид түүний гурван өмгөөлөгчийг экстремист үйл ажиллагаа явуулсан хэргээр баривчилсны дараа ингэх боломж багассан байна.
Одоо 47 настай Алексей Навальный нь Оросын сөрөг хүчний улс төрчдөөс нийтэд хамгийн их танигдсан хүн.
Тэрбээр олон жилийн турш Путиний дэглэмийг хурцаар шүүмжилж байгаа юм. Оросын нутаг дэвсгэрт ажиллаж байхдаа Навальный үл мэдэгдэх химийн бодист хордож байв. Тэрбээр Германд эмчлүүлснийхээ дараа 2021 онд эх орондоо буцаж ирээд баривчлагдаж байжээ.
Эх сурвалж: Reuters
