Мексикийн Тихуана, АНУ-ын Сан-Диего хотуудыг тусгаарласан хилийн хашаа

Мексикийн хойд хилийн боомт Тихуана хотод сүүлийн үед гарсан цуврал аллагыг ажиглагчид киноны үйл явдалтай зүйрлэж байна.

Өнгөрсөн сарын дундуур тус хотод үйл ажиллагаа явуулдаг хамгийн том картел болох Синалоагийн агуулахаас хэсэг цагдаа нар хувьдаа завших зорилгоор кокаин хулгайлжээ.

Энэ явдлын дараа картелын гишүүд барааг хулгайлсан цагдаагийн албан хаагчдаас хоёрыг нь алсан байна.

Тихуана бол аллагын тоогоор Мексикт тэргүүлдэг хот юм. Тус хотод жилд гардаг аллагын тоо энэ үзүүлэлтээр улсдаа хоёрдугаарт жагсдаг Сюдад Хуарез хотын тооноос хоёр дахин өндөр байдаг.

Мексикийн Баха Калифорни мужийн АНУ-тай залгаа хил дээр оршдог Тихуана хот 2.1 сая оршин суугчтай. Сүүлийн жилүүдэд энэ хотод жил бүр 2,000-аас дээш тооны аллага бүртгэгдэж байгаа. Харьцуулбал ойролцоо тооны оршин суугчидтай АНУ-ын Техас мужийн Хьюстон хотод 2022 онд 435 аллага гарсан байна.

Баха Калифорни мужийн ерөнхий прокурор Мариа Елена Андраде дээрх хэрэгт сэжиглэгдсэн гурван мөрдөгч, гурван цагдаагийн албан хаагчийг шалгаж байгаагаа саяхан мэдээлсэн юм.

Арваннэгдүгээр сарын 18-ны өдөр, хулгай гарснаас хойш хэдхэн цагийн дараа зэвсэгт этгээдүүд Тихуана хот дахь холбооны прокурорын газрын байр руу гал нээгээд зугтжээ.

Үүнээс хойш нэг цагийн дараа хулгайд оролцсон байж болзошгүй нэг цагдаа Тихуанагийн гудамжинд буудуулж алагдсан байна.

24-ний өдөр зэвсэгт этгээдүүд дахин прокурорын байр руу гал нээж, барилгын хананд олон тооны нүх үлдээжээ.

27-ны өдөр хулгайд оролцсон байж болзошгүй мужийн нэг мөрдөгч шатахуун түгээгүүрийн газарт автомашиндаа буудуулж алагдсан юм.

Тихуана хотын цагдаагийн албаны нэг эх сурвалжийн мэдээлснээр картелын гишүүд өөр гурван цагдаагийн аминд хүрчээ. Барааг нь хулгайлсны төлөө картел цагдаа нарыг нийтэд нь гэсгээн цээрлүүлэх ажиллагаа эхлүүлсэн байж болзошгүйг эх сурвалж эндээс дүгнэсэн байна.

“Энэ бол маш их санаа зовоосон асуудал. Тихуанад ийм хэмжээний аллага өмнө нь хэзээ ч гарч байгаагүй” гэж 2007-2008, 2011-2013 онуудад тус хотын цагдаагийн газрын дарга байсан Альберто Капелла хэвлэлд ярьжээ.

Тихуана хотод 2016 онд 919 аллага гарч байснаа 2017 онд 1,782 болон огцом нэмэгдсэн нь Синалоа болон Халиско картелуудын хооронд дэгдсэн дайнтай холбоотой гэгдэж байв.

Энэ оны зургаадугаар сард Тихуана хотын захирагч Монтсеррат Кабайеро аюулгүй байдлаа хангах үүднээс цэргийн баазад амьдрах шийдвэр гаргаж байжээ.

Эх сурвалж: Associated Press