Сүүлийн үед ОХУ-д өндөгний олдоц муудаж, үнэ нь огцом нэмэгдсэн байна.
Ирэх оны ерөнхийлөгчийн сонгуульд тав дахь удаагаа өрсөлдөхөөр болсон ерөнхийлөгч Путин улс орон нь Өрнөдийн эдийн засгийн хоригийг амжилттай даван туулж байгааг байнга ярьдаг.
Гэхдээ сүүлийн нэг жилийн дотор инфляц 7.5 хувьд хүрч, оросуудын худалдан авах чадвар буурсаар байгаа. Үүний нэг том илрэл нь өндөгний үнэ болж байна.
Тус улсын жижиглэн худалдааны зах зээлд өндөгний үнэ жилийн дотор 40 хувиар өссөн гэж Росстат статистикийн байгууллага мэдээлсэн юм.
Гэвч бодит байдал дээр бараг хоёр дахин өсөөд байна.
“Би айж байна! Зөвхөн өндөг биш, бусад бүх барааны үнэ өсөж байгаа нь хар дарсан зүүд шиг байна” гэж Москва хотын оршин суугч, 76 настай Елизавета Шалаевская ярьжээ.
21 настай оюутан Илья Зарубин “Би өмнө нь дэлгүүрээс өндгийг 70 рублиэр авдаг байсан бол одоо үнэ 130-140 рубль хүрээд байна” гэж AFP агентлагийн сурвалжлагчид ярьсан байна.
Шувууны аж ахуйд өргөн ашигладаг тэжээл, мал эмнэлгийн бараа бүтээгдэхүүн Өрнөдийн эдийн засгийн хоригт орсон нь өндөгний үнэ өсөхөд нөлөөлсөн гэж зарим мэргэжилтнүүд тайлбарлажээ.
Өндөгний үнийн өсөлт эрх баригчдын санааг бас зовоож эхэлсэн байна.
ОХУ-ын ерөнхий прокурор Игорь Краснов үйлдвэрлэгчид, борлуулагчид үнийг зохиомлоор хөөрөгдсөн эсэхийг шалгах ажлыг эхлүүлснээ саяхан мэдэгджээ.
Холбооны мал эмнэлэг, ургамлын эрүүл ахуйн хяналтын агентлаг Россельхознадзор зах зээлийн хомсдолыг арилгах зорилгоор Турк улсаас өндөг импортлох зөвшөөрөл олгосон байна.
ОХУ-ын хөдөө аж ахуйн яам Оросоос өндөг экспортлохыг зургаан сарын хугацаанд хориглох саналыг засгийн газартаа танилцуулжээ.
https://twitter.com/i/status/1734102247921844493
Оросын сошиал ертөнцөд Украины хилийн ойролцоо оршдог Белгород хотод өндөг худалдаж авахаар урт дараалалд зогссон хүмүүсийн дүрс бичлэг, гэрэл зураг олноор цацагдаж байна.
Белгород мужийн дэд захирагч Юлия Щедрина “Хомсдол үүсэхгүй. Бүгдэд хангалттай хүрэлцэхүйц өндөг байгаа” гэж Телеграм хуудсандаа бичжээ. Гэхдээ тэр нэг хүнд 20-оос илүү өндөг худалдахгүй болсныг дараа нь зарласан байна.
Оросын уламжлалт хоол хүнсний орц найрлагад өндөг чухал ач холбогдолтой байдаг. Ялангуяа шинэ жилийн баяраар өндөгний эрэлт эрс нэмэгддэг юм.
Эх сурвалж: AFP
