Украины дайнд ОХУ-ын амссан хохирлын хэмжээг хэрхэн дүгнэж байгаагаа АНУ-ын тагнуулын албад Даваа гарагт Конгрессын чуулганд хаалттай танилцуулжээ.
Энэхүү мэдээлэлд ойр ажилладаг албаны эх сурвалж өчигдөр танилцуулсан зарим тоо баримтыг хэвлэлд дэлгэсэн байна.
Тухайлбал өнгөрсөн хоёр жил хүрэхгүй хугацаанд Оросын армийн 315,000 цэрэг алагдаж, шархадсан нь дайн эхлэх үед Украинд халдан довтолсон нийт хүн хүчний тооны 87 хувь болж байгаа гэнэ. Анх дайн эхлэхэд гэрээт болон хугацаат цэргийн алба хаагч нийлээд 360,000 цэрэг Украинд орсон юм байна.
Үүнээс гадна 3,500 танкийн 2,200, 13,600 хуягт тэрэгний 4,400 орчим нь устгагдсан гэж дүгнэжээ.
Ерөнхийдөө энэ дайн Оросын эрх баригчдын хуурай замын зэвсэгт хүчнээ шинэчлэх, орчин үежүүлэх үйл явцыг 15 жилээр ухраасан гэж АНУ-ын тагнуулын албад дүгнэсэн байна.
“Арваннэгдүгээр сарын сүүлчийн байдлаар ОХУ дайн эхлэхээс өмнө байсан хуурай замын цэргийн техник хэрэгслийнхээ дөрөвний нэгээс илүү хэсгийг алдсан. Энэ нь 2022 оны эхнээс хойш Украинд томоохон ахиц дэвшил гаргаж чадаагүй Оросын байлдааны ажиллагааг улам нарийн төвөгтэй болгож, цар хүрээг нь багасгаж байна” гэж дээрх дүгнэлтэд өгүүлжээ.
Хэдийгээр ийм хэмжээний хохирол амссан ч ОХУ-ын ерөнхийлөгч Владимир Путин эхлүүлсэн дайнаа зогсоох шинжгүй байгаа.
Украины тал ч бас дайнд нэлээд туйлдаж, суларсан тул ойрын үед фронтын шугамыг өөрчилж чадахгүйг АНУ-ын албаныхан анхааруулж байна. Одоо АНУ-ын дотоод улс төрийн зөрчлийн улмаас Украинд үзүүлэх $61 тэрбумын тусламж саатаад байгаа.
Ерөнхийлөгч Байдены засаг захиргаа Украинд үзүүлэх тусламжийн мөнгө энэ оны сүүлээр шавхагдаж байгааг анхааруулсан юм.
Украины ерөнхийлөгч Володимир Зеленский өчигдөр буюу Мягмар гарагт АНУ-ын хоёр намын хууль тогтоогчид болон ерөнхийлөгч Байдентай уулзахаар Вашингтонд айлчлан ирсэн байна.
Эх сурвалж: CNN