Турк улсад болсон PUBGM тоглоомын ДАШТ-д манай улсын "IHC esports" баг түрүүлж, "Stalwart esports" баг хоёрдугаар байр, "4Merical vibes" баг дөрөвдүгээр байр эзлээд өчигдөр эх орондоо ирсэн билээ. Эдгээр тамирчдад ЦХХХ-ны сайд Н.Учрал болон яамны харьяа байгууллагуудын төлөөлөл өнөөдөр баяр хүргэж, шагнал гардуулж өглөө.
Сайд Н.Учрал "Монгол Улс Цахим Хөгжил, Харилцаа Холбооны Яамыг/ЦХХХЯ/ 2022 онд байгуулсан. Дэлхий дахинд цахим эдийн засагт том хувь нэмрээ оруулсан он жилүүд өнгөрч байна.
2022 оны тайланд цахим эдийн засагт үзүүлж буй цахим спортын хувь нэмэр, нийт борлуулалтын орлого 3.8 тэрбум ам.долларт гарсан болохыг дурдсан байсан. Эдийн засагт цахим спорт том жин дарж байна.
PUBGM тоглоомын дэлхий аварга манай улсаас төрөн гарсанд бахархаж байна. Энэ нь орчин цагийн залуучуудын хурд, хүч, оюун санаа, авхаалж самбаа ямар түвшинд байгаагийн илэрхийлэл.
ЦХХХЯ-наас Цахим элч тодруулах журмыг баталсан байдаг. Засгийн газар, ЦХХХ-ны сайдын тушаалаар дэлхийн аваргаар тодорсон "IHC esports" багийн хамт олныг Монгол Улсын Цахим элчээр өргөмжилж байна.
Дэлхийн аваргаар тодорсон "IHC esports" болон хоёрдугаар байрт орсон Stalwart esports", дөрөвдүгээр байр эзэлсэн "4Merical vibes" багийн залуучууд, дасгалжуулагчдыг Мэдээлэл, Харилцаа Холбооны салбарын тэргүүний ажилтан цол тэмдэг, яамны жуух бичгээр шагнаж байна.
Үүнээс гадна төрийн мэдэлд байдаг интернэтийн шууд урсгалаас шилэн кабелаар холбож, тамирчдын бэлтгэл хийж буй байруудыг нэг жилийн хугацаанд өндөр хурдны интернэтээр хангахаар боллоо. Өөрөөр хэлбэл тамирчид ямар нэгэн оператор компаниар дамждаггүй, өндөр хурдны интернэт ашиглана.
Ирэх онд олон улсад зохион байгуулагдах тэмцээнүүдэд оролцоход нь төрөөс бодлогын дэмжлэг үзүүлнэ" гэв.
PUBGM тоглоомын багийн тамирчид өндөр хурдны интернэттэй болсноор саад тотгоргүйгээр бэлтгэл, сургуулиа хийх боломж бүрдэж буйг онцоллоо.
Тэрбээр "Цахим спортод хандах хандлага төдийлөн өөрчлөгдөөгүй байна. Би хүүхэд байхаас Red alert тоглож өссөн хүн. Одоо цахим спорт мэргэжлийн болж, орлого бүрдүүлдэг болсон байна. Эцэг эхчүүд хүүхдээ компьютерын ард юу хийгээд байгаа юм болоо гэж гайхдаг цаг өнгөрсөн" гээд цахим спортод хандах хандлагаа өөрчлөхийг олон нийтэд уриалав.
