Даваа гарагийн өглөө Умард Солонгос ямар нэг пуужингийн туршилт гүйцэтгэсэн талаар Өмнөд Солонгосын зэвсэгт хүчин мэдээлсэн юм.
Тэгвэл энэ нь хатуу түлшээр ажилладаг, тив алгасах Хвасон-18 баллистик пуужин байсныг Умард Солонгосын тал өнөөдөр мэдээлжээ.
Уг туршилт нь “Вашингтон алдаатай шийдвэр гаргавал ямар хариу арга хэмжээ авч чадахаа харуулсан хэрэг” гэж Ким Жон Ун хэлснийг Пёньяны төв хэвлэл мэдээлсэн байна.
Хвасон-18 пуужин дээд тал нь 6,500 гаруй километрийн өндөрт хүрч, зүүн тэнгисийн усанд 1,000 орчим километр зайтай байрласан байг 4,415 секундийн (нэг цаг, 13 минут орчим) хугацаанд “яг оносон” тухай Солонгосын Төв Мэдээний Агентлаг мэдээлжээ.
Ийм пуужинг хэвийн траектороор харвавал дээд тал нь 15,000 км зайд цохилт өгөх чадвартай буюу АНУ-ын эх газрын аль ч цэгт хүрэх боломжтой гэж мэргэжилтнүүд дүгнэж байна.
Туршилтын үр дүнд Ким Жон Ун сэтгэл хангалуун байгаа тухай Пёньяны мэдэгдэлд дурджээ.
Умард Солонгосын дэглэм энэ онд тав дахь баллистик пуужингаа туршсан нь энэ юм. Тус улс түүхэндээ нэг жилийн хугацаанд ийм олон зэвсэг туршиж байгаагүй билээ.
Хатуу түлштэй Хвасон-18 пуужингийн хувьд энэ оны гурав дахь туршилт нь болж байна. Өмнө нь дөрөв ба долдугаар саруудад туршиж байжээ.
Хатуу түлштэй пуужин нь шингэн түлштэй пуужинтай харьцуулахад хөөрөхдөө илүү богино хугацаа зарцуулдаг тул урьдчилан мэдэж, хариу арга хэмжээ авахад хэцүү байдаг юм.
Эх сурвалж: Yonhap News
