Даваа гарагт ОХУ-ын гадаад хэргийн сайд Сергей Лавров тус улсын төв телевизийн сувагт өгсөн ярилцлагадаа Орос болон бусад улсуудын хооронд газар нутгийн ямар нэг маргаан байхгүйг мэдэгджээ.
“Бид НАТО-гийн орнуудтай газар нутгийн ямар нэг маргаангүй. Ерөнхийдөө бид Японыг оролцуулаад аль ч улстай газар нутгийн маргаангүй болсон” гэж Лавров энэ үеэр ярьсан байна.
Эндээс харвал Москвагийн эрх баригчид маргаантай дөрвөн арлын асуудлаар Японы талтай цаашид ямар нэг тохиролцоо хийхгүйг Лавров ийнхүү илэрхийлжээ.
Дэлхийн Хоёрдугаар дайны дараа үүссэн дөрвөн арлын маргаан хоёр улсыг энхийн гэрээ байгуулахад саад болсоор өнөөдрийг хүрсэн юм.
Хоккайдо арлаас хойд зүгт оршдог Кунашири, Эторофү, Шикотан, Хабомай арлуудыг Японы тал Умард газар нутаг, Оросын тал Өмнөд Курилийн арлууд гэж нэрлэдэг.
Дэлхийн Хоёрдугаар дайны сүүлээр Зөвлөлтийн цэрэг эзлэхээс өмнө эдгээр арлууд өөрийнх нь газар нутаг байсан гэж Японы тал үздэг юм.
Украины дайнтай холбогдуулан Өрнөдийн орнуудын Оросын эсрэг авсан эдийн засгийн хориг арга хэмжээнд Япон улс нэгдсэн. Үүний улмаас энхийн гэрээ байгуулах, газар нутгийн маргааныг шийдвэрлэх үйл явцыг зогсоож байгаагаа 2022 оны гуравдугаар сард Оросын эрх баригчид мэдэгдэж байв.
Эх сурвалж: Kyodo News