Шинэ он эхэллээ. Энэ бол Григорийн тооллын 2024 он бөгөөд 21-р зуун буюу гурав дахь мянганы 24 дэх жил юм. 2024 он Даваа гарагт эхэлсэн. Үүнтэй холбоотойгоор үсрэнгүй жил хэмээн тодотгож байна.
Түүнчлэн улс төрийн хүрээнийхэн "Ер бусын завгүй жил" гэж нэрлэж байна. Ингэх шалтгаан нь энэ онд дэлхийн 40 гаруй улс оронд Ерөнхийлөгчийн болон Парламентын сонгууль болох юм.
Тэр дундаа дэлхийн хамгийн олон хүн амтай эхний арван орны долоод нь сонгууль болно. Тухайлбал, Бангладеш, Пакистан, Орос, Энэтхэг, Мексик, Индонез, АНУ гэхчлэн. Түүнчлэн Евро парламентын сонгууль ч бас болно. Эдгээрээс хамгийн их анхаарал татаж байгаа нь гуравдугаар сарын 17-нд болох ОХУ, арваннэгдүгээр сарын 4-нд товлогдоод буй АНУ-ын Ерөнхийлөгчийн сонгууль юм. Энэтхэгт болох сонгууль ч бас анхаарлын гадна үлдсэнгүй.
Энэ жилийн олон сонгуультай холбоотойгоор Хиймэл оюун ухаан сонгогчдод нөлөөлж, тэднийг урвуулж, дэлхий даяар улс төрийн ташаа мэдээлэл, ардчиллаас ухрах эрсдэлийг нэмэгдүүлэх вий гэсэн болгоомжлол байна.
Эхэлж буй нэгдүгээр сард багтаж Бразил, Египет, Иран, АНЭУ, Саудын Араб, Этиоп улс БРИКС-т нэгдэнэ. Ингэснээр БРИКС хүн ам болон эдийн засгийн чадлаараа хүчирхэг нэгдэл болон хөгжих нь тодорхой болж байна.
Мөн гуравдугаар сард Румын, Болгар улс Шенгений бүсэд албан ёсоор элсэнэ.
2024 оны онцлох үйл явдлын нэг нь 11 дүгээр сард "Артемида" хөтөлбөрийн хүрээнд АНУ-ын сансрын нисэгч бүхий жолоодлогот хөлгийг сар руу хөөргөхөөр төлөвлөж байгаа явдал юм.
Улс төрөөс гадна 2024 он олимпийн жил гэдгээрээ онцгойрч байна. Мөн НҮБ-ын шийдвэрээр 2024 оныг олон улсын тэмээчдийн жил болгон зарласан.
2024 оны спортын онцлох үйл явдал: Парисын зуны 33 дугаар олимп
Ирэх оны 7-р сарын 26-нд Парист зуны Олимпийн наадам эхэлж наймдугаар сарын 11-ийг дуустал үргэлжилнэ. Парис хотод өмнө нь 1900 болон 1924 онд зуны Олимпын наадмыг зохион байгуулж байсан туршлагатай. Наадмын нээлт анх удаагаа цэнгэлдэх хүрээлэнд бус гадна, хотын яг төвд болно. Тамирчид цэнгэлдэх хүрээлэнгийн замаар алхахын оронд Парисын Сена мөрнөөр завиар хөвөх болно. Тэднийг 600,000 гаруй үзэгч үзэж сонирхоно гэсэн мэдээлэл байна. Тодотгоход, Лос Анжелес хотод дараагийн 2028 оны зуны олимпыг зохион байгуулах юм.
Европын хөлбөмбөгийн аварга шалгаруулах тэмцээн
2024 оны спортын онцлох үйл явдлын нэг нь Европын хөлбөмбөгийн аварга шалгаруулах 17 дахь удаагийн тэмцээн юм. Энэ нь УЕФА-гийн гишүүдийн үндэсний багуудын дунд дөрвөн жилд нэг удаа зохиогддог хөлбөмбөгийн тэмцээн юм. Ирэх 6, 7-р сарын турш үргэлжлэх Европын хүчирхэг орнуудын тамирчдын уулзалт болох Евро 2024 нь Берлинээс Мюнхен, Лейпциг-Гамбург, Кёльн-Дортмундын хооронд тоглолтууд болно. Германы шигшээ багийн эхний тоглолт 6-р сарын 14-нд Мюнхенд болох юм.
Индонези улс шинэ нийслэлдээ төвхнөнө
Индонези улс нийслэл хотоо Нусантара руу шилжүүлнэ. Индонезийн тусгаар тогтнолын өдөртэй давхцуулан 2024 оны 8-р сарын 17-нд шинэ Нийслэл хотынхоо нээлтийг хийхээр төлөвлөж байна. Ингэснээр Жакарта нь тус улсын нийслэл байхаа больж Нусантараар солигдох бөгөөд Жакарта нь 1945 онд тусгаар тогтнолоо зарласнаас хойш тус улсын албан ёсны нийслэл байсаар ирсэн юм. Тус хот нь 10 гаруй сая хүн амтай дэлхийн томоохон хотуудын нэг юм.
Эх сурвалж: Toim.mn
