Швейцарын зөвлөх үйлчилгээний Henley & Partners компани 2023 оны байдлаар дэлхийн улс орнуудын паспортын чансааг гаргажээ.
Ингэхдээ тухайн улсын паспорттой иргэд дэлхийн 227 улс, бүс нутгийн хэдэд нь визгүй зорчиж байгаагаар үнэлсэн байна.
Жагсаалтад Монгол улсын паспорт дэлхийн 63 улсад визгүй зорчих эрхтэйгээр 79 дүгээрт эрэмбэлэгджээ.
Өнгөрсөн онд манай улсын паспорт мөн 79 дүгээрт эрэмбэлэгдэж байсан юм.
2023 оны жагсаалтыг адилхан дэлхийн 194 улсад визгүй зорчих эрхтэй Франц, Герман, Итали, Япон, Сингапур, Испани улсуудын паспорт тэргүүлсэн байна.
Дэд байрыг 193 улсад визгүй зорчих эрхтэй Финланд, Өмнөд Солонгос, Швед гурван улсын паспорт эзэлжээ.
Жагсаалтын сүүлийн таван байрыг Йемен, Пакистан, Ирак, Сири, Афганистан улсууд дэлхийн 35, 34, 31, 29, 28 улсад тус тус визгүй зорчих эрхтэйгээр эзэлсэн байна.
Сүүлийн 10 жилийн хугацаанд чансаа нь хамгийн хурдтай өссөн паспорт Арабын Нэгдсэн Эмират Улсынх байжээ. 2014 оноос хойш тус улс визгүй зорчдог 106 улс шинээр нэмж, 55 дугаар байраас 11 дүгээр байрт ахисан байна.
Чансааны өсөлтөөр тэргүүлэгчдийн дунд бас сүүлийн 10 жилд адилхан 21 байраар урагшилсан Украин, Хятад улсууд оржээ.
Одоо Украин улсын паспорт 148 оронд визгүй зорчих эрхтэйгээр 32 дугаарт, Хятадын паспорт 85 оронд визгүй зорчих эрхтэйгээр 62 дугаарт тус тус эрэмбэлэгдэж байна.
Харин паспортын чансаа нь хамгийн их суларсан орнуудын нэг Орос улс болжээ. Сүүлийн арван жилд тус улс визгүй зорчих 24 улс шинээр нэмсэн ч 2014 оноос хойш 13 байраар ухарч, 51 дүгээрт эрэмбэлэгдэх болжээ.
Монгол улсын хувьд сүүлийн 10 жилийн хугацаанд 77 дугаар байраас хоёр шат ахисан байна.
Жагсаалттай энэ холбоосоор танилцах боломжтой.
Эх сурвалж: Henley & Partners
