УИХ-ын чуулганаар хэлэлцэж буй Хөрөнгө оруулалтын тухай хуулийн төслийн талаар МҮХАҮТ, Монгол дахь Америкийн худалдааны танхим, Европын холбооны худалдааны танхим, их Британийн худалдааны танхим зэрэг бизнесийн байгууллагын төлөөлөл өнөөдөр мэдээлэл хийж, байр сууриа илэрхийллээ. МҮХАҮТ-ын зүгээс өмнө нь хуулийн төслөөр бизнес эрхлэгчдийн дунд хэлэлцүүлэг зохион байгуулж, 60 орчим саналыг хууль санаачлагчдад хүргүүлсэн бөгөөд зарим санал хуулийн төсөлд тусгагдаж орсныг МҮХАҮТ-ын Ерөнхийлөгч Д.Энхтүвшин мэдээлээд, “Бизнес эрхлэгчдийн дунд хийсэн судалгаагаар хамгийн эхний чухал алхам бол хууль, эрх зүйн орчныг сайжруулах явдал” хэмээн дүгнэснийг санууллаа.
Одоо хүчин төгөлдөр мөрдөгдөж байгаа хуульд байхгүй, шинэчлэгдэж сайжирсан зүйлүүд хуулийн төсөлд цөөнгүй туссан. Тухайлбал төрийн байгууллагуудын уялдаа холбоог сайжруулах, төрийн захиргааны төв байгууллагаас гадна, төрийн бусад байгууллага, орон нутгийн байгууллага ямар түвшинд оролцох тухай заалтуудыг оруулсан. Мөн маргаан үүсэхэд шийдвэрлэх чиглэлээр бүтэн бүлэг нэмж оруулсныг олзуурхаж байгаагаа МҮХАҮТ-ын ерөнхийлөгч хэллээ. Энэ мэтчилэн сайжирсан зүйлс нэлээд байна. Гэхдээ хуулийн төслийг дахин хэлэлцэж, сайжруулах зүйлс ч байгаа. Ялангуяа татварын хөнгөлөлт, урамшуулалттай холбоотой заалтууд байхгүй болсон зэрэг ухарсан зүйлүүд бий. Тэдгээрийг хэлэлцүүлгийн явцад өөрчилж засаад явах боломжтой. Тиймээс хуулийн төслийг хэлэлцэх нь зүйтэй гэж үзэж байгаагаа хуралд оролцогчид илэрхийллээ. Хэрвээ хуулийн төслийг хэлэлцэхгүй буцаавал олон улсын хамтын нийгэмлэг, хөрөнгө оруулагчдад буруу мэссэж өгнө гэдгийг тэд онцолсон юм.