Маргааш буюу 13-нд Таваньд Ерөнхийлөгчийн болон парламентын сонгууль нэгэн зэрэг болно. Олон улсын анхаарал татсан асуудал энэ болов. Учир нь арлын сонгууль нь Хятад Америкийн харилцаанд онцгой нөхцөл байдал үүсгэж болзошгүй юм. Энэ тухай хойно өгүүлнэ.
Сонгуульд Тайваний томоохон намуудаас гурван нэр дэвшигч өрсөлдөнө. Үүнд Ардчилсан дэвшилт намаас Лай Чиндэ, Гоминданы намаас Хоу Юи, Тайванийн Ардын намаас Ко Вэнженар өрсөлдөнө. Өрсөлдөгч тус бүрийг товчхон тодотговол:
Лай Чиндэ /Уильям Лай/ 1959 онд төрсөн. Эмчийн мэргэжилтэй. Тэрээр арав гаруй жил хууль тогтоогчоор ажилласан бөгөөд дараа нь өмнөд нутгийн Тайнан хотын дарга байсан. Одоо Тайванийн дэд ерөнхийлөгчөөр ажиллаж байна.
Лай нь тусгаар тогтнолыг дэмжигчдийг хамгийн их татдаг боловч өнгөрсөн хугацаанд төв үзэлтэй сонгогчдын дунд алдартай байсан. Тэрээр өөрийгөө “Тайванийн тусгаар тогтнолын төлөөх прагматик тэмцэгч” гэж тодорхойлсон удаатай. Лай одоогийн ерөнхийлөгч Цай-гийн үзэл баримтлалыг дагаж мөрдөх нь бараг тодорхой. Тэрээр Хятадтай хэлэлцээгээ сэргээх хүсэлтэй байгаагаа мэдэгдсэн. Хятадтай хамтран ажиллаж, Тайвань, Хятадыг "ах дүү ард түмэн" гэж үзэхийг хүсч байна гэжээ.
Гоминдан намын нэр дэвшигч Хоу Юй 1957 онд төрсөн, 2006-2008 онд Тайваний Үндэсний цагдаагийн газрын даргаар, 2018 оноос нийслэл хотын захын дүүрэг болох Шинэ Тайбэй хотын захирагчаар ажиллаж байна. Тэрээр Тайванийн хоолойн хоёр эргийн хурцадмал байдлыг намжаах зорилгоор Коммунист намтай хэлэлцээ хийхийг дэмжиж байна.
Нэр дэвшигч Ко Вэнже 1959 онд Синчу хотод төрсөн. 2019 оноос хойш Тайваний Ардын Намын даргаар ажиллаж байна. Ко Вэнже бол анагаахын карьераа амжилттай дуусгасны дараа улс төрд орсон эмч юм. Ко 2014 онд Тайпей хотын даргаар сонгогдсон. Тэрээр Тайванийн ерөнхийлөгчийн дараа хоёр дахь хамгийн хүчирхэг улс төрийн албан тушаалд тооцогддог хоёр удаа ажилласан.
Гадаад бодлого, үндэсний аюулгүй байдлын асуудлаар Ко-гийн байр суурь байнга зөрчилддөг. Тэрээр Америк бол Тайваний хамгийн чухал түнш, гэхдээ үүний зэрэгцээ Тайвань Америк, Хятадтай харилцаагаа "динамик тэнцвэрт байдалд" байлгах хэрэгтэй гэж тайлбарладаг. Мөн Тайванийн бие даасан байдлыг хадгалж, Бээжинтэй яриа хэлэлцээг сэргээх цорын ганц нэр дэвшигч гэж сонгогчдод итгүүлэхийг хичээдэг.
Ийм гурван өрсөлдөгч Ерөнхийлөгчийн төлөө өрсөлдөхөөр бэлдэж байна. Гэхдээ энэ удаагийн сонгуульд нэр дэвшсэн бүх нэр дэвшигчид БНХАУ-ын шахалтыг эсэргүүцэхийн зэрэгцээ тусгаар тогтнолоо зарлахаас түдгэлзэхээ мэдэгдсэн. Мөн тэд улс орны батлан хамгаалахын зардлыг нэмэгдүүлэхээ амласан гэдгээрээ нийтлэг байгаа бололтой.
БНХАУ-ын дарга Ши Жиньпин шинэ оны мэндчилгээндээ Хятад Тайваньтай нэгдэх нь түүхэн шаардлага юм гэж мэдэгдсэн. Тэрээр өмнө нь Хятад улс шаардлагатай бол Тайванийг хүчээр эргүүлэн авахад бэлэн гэдгээ илэрхийлж байсан нь бий.
Гэвч АНУ "Нэг Хятад" бодлогыг дэмждэг хэдий ч арлын аюулгүй байдлын баталгааны үүрэг гүйцэтгэдэг бөгөөд хэрэв нөхцөл байдал хурцадвал дэлхийн цэрэг, эдийн засгийн тэргүүлэгч хоёр гүрний хооронд мөргөлдөөн болж хувирах вий гэсэн болгоомжлолыг хэвлэлүүд онцолж байгаа юм.
Хятадын ГХЯ-ны төлөөлөгч АНУ-ыг Тайванийн сонгуулийн асуудлаар улаан шугамыг давж байна гэж буруутгаад "Тайваний асуудал бол Хятадын дотоод хэрэг бөгөөд энэ нь гадны хөндлөнгийн оролцоог үл тэвчих Хятадын орон нутгийн хэрэг" гэж мэдэгдээд байна.
Эх сурвалж: katehon.com. Лента.ру.
