Засгийн газраас санаачилж, олон жил дарагдаж өдгөө, УИХ-ын чуулганаар "дуншиж" байгаа Хөрөнгө оруулалтын тухай хуулийн шинэчилсэн найруулга олны анхааралд орж, үүнээс болж нам эвсэл улстөрчид хоорондоо алалцсаар байна.
Нэг хэсэг нь энэ хуулийг батлуулж, хэрэгжүүлж болохгүй. Монгол Улсын Үндсэн хууль болон ард түмний эрх ашиг, улс орны бүрэн бүтэн байдалд харшлах хууль учраас дэмжихгүй гэсэн байр суурийг илэрхийлж, тэмцэж эхэллээ.
Харин нөгөө хэсэг нь гадны хөрөнгө оруулагчид манай улсад агаар ус мэт хэрэгтэй байна. Тиймээс энэ хуулийг чуулганы хуралдаанаар нэн даруй хэлэлцүүлж, эцэслэн батлуулах хэрэгтэй байгаа юм гэж чичирсэн дүр зураг ил тод харагдаж байна. Өөрөөр хэлбэл, ХО-ын тухай хуулийг зүтгүүлж байгаа сайд Ч.Хүрэлбаатарын ард ямар эрх ашиг нуугдаж байна хэмээн ч хардсан нэр бүхий хүмүүс энэ хуулинд хориг тавиулахаар "хөдөлсөн". Тодруулбал, Ерөнхийлөгч асан Х.Баттулга ил гарч ирж, УИХ-ын дарга Г.Занданшатарт шаардлага хүргүүлсэн. Хүргүүлсэн шаардлага нь дээрх хуулийг олон нийтээр хэлэлцүүлэх, эс бөгөөс сонгуулийн дараа хэлэлцүүлэхийг шаардсан. Тухайлбал, эрх барьж байгаа Ардын намын бүлэг энэ хуульд хөнгөн хуумгай хандаж болохгүй. Гурван сая иргэний эрх ашгийг ганц намын бүлэг хамгаалж чадахгүй гэсэн байр суурийг экс Ерөнхийлөгч хэвлэлийнхэнд илэрхийлсэн.
Тэгвэл дотроо талцдаг, өнөөдрийг хүртэл нэг голдрилд орж чадаагүй Ардчилсан намынхан намын дарга болох Лу.Гантөмөр болон Ерөнхийлөгч асан Х.Баттулга нарыг намаасаа хөөх ажлыг хийж эхэлжээ.
Энэ талаар өнөөдөр 12:30 цагаас АН-ын гишүүд Хөрөнгө оруулалтын хуулийг дэмжиж, харин эсрэг байр суурьтай байгаа Х.Баттулга, Лу.Гантөмөр тэргүүтэй хүмүүсийг АН-ын удирдлагаас огцруулахаар хэвлэлийн бага хурал зарлажээ. Ингэснээр АН-ынхан мөн тогоон дотроо түймэр тавих нь ээ.
