Саяхан Якутын SakhaLife сайтад Оросын нийслэлийг Эрхүү хотод (Иркутск) шилжүүлэх тухай түүхийн ухааны доктор Афанасий Николаевын саналыг нийтэлжээ.
Уг ил захидалд “Оросын Азийн хэсгийн хөгжлийг Европын хэсгийн хөгжилтэй тэнцвэржүүлэх” зорилгоор ийм алхам хийх ёстойг түүхч тайлбарласан юм байна.
Тэрбээр бас Эрхүү хотыг эрт цагаас хойш Евразийн хойд хэсгийг эзлэн оршиж байсан домогт Татар хэмээх бүс нутгийн нэг төв байсныг онцолжээ.
Түүхчийн саналын талаар өчигдөр сэтгүүлчид Кремлийн хэвлэлийн албаны дарга Дмитрий Песковын байр суурийг лавласан байна.
Тэрбээр ил захидлыг уншаагүй ч утга санааг нь хэвлэлүүдээс олж мэдсэнээ хэлжээ.
“Уг санаачилгыг хэрэгжүүлэх боломжгүй гэж би бодож байна” гэж Песков энэ үеэр хариулсан байна.
Эх сурвалж: ТАСС
