Ардчилсан намаас нэр дэвшиж их хурлын гишүүний сэнтийд заларсан УИХ-ын гишүүн А.Адьяасүрэн нутгийн ах УИХ-ын дарга Г.Занданшатартаа гомдсон бололтой. Нэг нутгийнх ч хоёр өөр намын гишүүд өрсөлдөж маргалдаж мууцалцаж нэгнээ Үндсэн хуулийн цэцэд шалгуулахаар өгөх нь энүүхэнд аж. Тодруулбал гишүүн А.Адьяасүрэн, Г.Занданшатарыг Үндсэн хууль зөрчсөн хэмээн гомдол гаргаж буй талаараа өнөөдөр хэвлэлийнхэнд мэдээлэл хийхээр болжээ.
Түүний хувьд Хөрөнгө оруулалтын тухай хуулийн шинэчилсэн найруулгыг эзнийхээ захиалгаар их эсэргүүцэж байгаа юм. Үүнтэй холбоотойгоор Үндсэн хуулийн цэцэд хандаж байгаа юм болов уу. Өнгөрсөн долоо хоногт чуулганы хуралдааны үеэр А.Адьяасүрэн нь "Монголын малчид малаа хариулах газаргүй болж байна. Сошиалаар та нар харж байгаа байх. Гадны хөрөнгө оруулагч гэж нэг нөхөр малчдыг бэлчээр дээрээс нь хөөх ийм эрсдэл үүсч байна шүү дээ. Ч.Хүрэлбаатар сайдаа та энэ хуулиа татчихаач. Үнэхээр тийм бол ард иргэдээс нийтийн санал асуулга аваач" хэмээн ихэд уурласан юм. Мөн тэрбээр энэ хуулиар малчдад эрсдэл үүсч байна гэж хэлсний төлөө микрофон хааж байна. Миний үг хэний эрх ашгийг хөндөв гэсэн юм.
Тухайлбал, Хөрөнгө оруулалтын тухай хуулийг Ерөнхийлөгч асан Х.Баттулга тэргүүтэй хэсэг бүлэг хүмүүс эсэргүүцэж, хориг тавиулахаар, эргэж харуулахаар УИХ-ын дарга Г.Занданшатарт шаардлага хүргүүлсэн байгаа юм. Тэгвэл үүнтэй холбоотой асуудлаар А.Адьяасүрэн гишүүн ҮХЦ-д хандаж байгаа бололтой.