УИХ-ын гишүүн А.Адьяасүрэн гишүүдтэй АН-ынхан өнөөдөр Үндсэн хуулийн цэцийн гадаа мэдээлэл хийлээ. Тодруулбал, тэд Хөрөнгө оруулалтын тухай хуулийг эсэргүүцэж, энэ хуулиа эргэн харах, засаж залруулахыг сайжруулахыг хүсэж, УИХ-ын дарга Г.Занданшатарыг Үндсэн хууль зөрчиж байна гэсэн шалтгаанаар ҮХЦ-д өгч байгаагаа мэдэгдлээ.
Энэ үеэр П.Галиндэв "Монгол Улсын эрх ашиг зөрчигдсөн хууль орж ирснийг ард иргэд мэдэж байгаа. Улс үндэстэн байгаа цагт улсын эрх ашиг гэж бий. Ч.Хүрэлбаатарын энэ хуулийг 2 дахь удаагаа ҮХЦ-д өгч байсан. Үндэсний аюулгүй байдалд харшилсан хууль оруулж ирээд байна. Яагаад Үндсэн хууль зөрчсөн бэ гэхээр энэ хуулийн 6-р бүлэгт байгаа гадаадын хөрөнгө оруулалттай холбоотой ялангуяа гадаадын төрийн өмчит компани монголын эдийн засагт хөрөнгө оруулалт хийхээр бол Монголын төрөөс зөвшөөрөл авч хөрөнгө оруулалт хийнэ гэсэн заалтыг Ч.Хүрэлбаатар хулгайгаар алга болгосон.
Хуулийн хулгай бол Үндэсний аюулгүй байдлыг зөрчиж байна. Монгол Улсын үндэсний аюулгүй байдлыг маш ноцтойгоор зөрчиж байна. Нийтэд нийгэмд талцсан зүйл байхгүй. Бүгд нэг талдаа байгаа шүү. Монголын газар нутаг иргэдийн өмч шүү. Яагаад өмчөө гадныханд өгөх гээд байгаа юм бэ. Газар нутгаа өгнө гэдэг тусгаар тогтнолоо өгч байна гэсэн үг. Үндэсний эрх ашгаа хамгаалах ёстой нам яагаад дуугарахгүй байгаа юм бэ. Ардын намынхан Ч.Хүрэлбаатараасаа айгаад дуугардаггүй юм байна. Хөлөө хүргэх газар хүртлээ явах болно. Маш ноцтой хуулийн зүйл заалтаа татаад авчихаач. Яагаад сонгуулийн өмнө зүтгүүлээд байгааг харж хардах эрхтэй шүү" гэлээ.
