Томуу томуу төст өвчний дэгдэлт их байгаа. Хүний биеийн гадаргуу дээр өвчин үүсгэгч 4-5 төрлийн вирус, том хүний шүлсэнд 700 гаруй нян бактери байдаг. Тиймээс сар шинийн баяраар золгохдоо бага насны хүүхдийн эрүүл мэндийн эрсдэлийг тооцоолж үнсэлгүй зөвхөн духан дээр нь үнэрлэхийг НЭМҮТ болон ЭМЯ-наас анхааруулан зөвлөж байна.

Томуугийн вирус амны хөндийгөөр дамжиж уушги гуурсан хоолой руу ордог. Бага насны хүүхдийн дархлаа сул байдаг. Үнсэх хүрэлцэхэд халдвар дамжих эрсдэл өндөр байдаг гэнэ.

Сар шинийн баяраар хүүхдүүд хордлого, насанд хүрэгсэд нойр булчирхайн өвчинд ихээр өртдөг. Тэгвэл майонез, өндгөн бүтээгдэхүүнээр хутгасан зууш тодруулбал, нийслэл салат зэргийг тасалгааны температурт, ширээн дээр 3 цагаас илүү хугацаанд байлгахгүй байхыг зөвлөж байна. Мөн баярын шүүс болох чанасан ууц, өвчүүнд энэ хамааралтай аж.

Сар шинийн баяраар хүүхдийнхээ дархлаа сэргээх найман цэгт гавар түрхэх, айлаас айл хооронд зочлохдоо гарыг нь угаах эсвэл бактери устгагч хэрэглэх, айлууд энэ нөхцөл бололцоогоор хангахыг зөвлөж байна. Мөн дотоод орчны бохирдол, тоосжилтоос сэргийлж, улавч хэрэглэх болон гадуур гутлаа үүдэнд тайлж орох нь хэрэгтэйг мэргэжилтнүүд зөвлөж байна.