"Нүүрсний" гэх тодотголтой 11 хүнд холбогдох хэргийн шүүх хурал өнөөдөр тав дахь өдрөө хаалттай үргэлжилнэ. Шүүх хуралдаанаар нотлох баримт шинжлэх судлах процесс үргэлжилж байна гэж Чингэлтэй, Баянзүрх, Сүхбаатар дүүргийн шүүхээс мэдээлсэн бөгөөд өнөөдөр мөн үргэлжлэх юм.
Тодруулбал, энэ хэрэгт гишүүн асан Т.Аюурсайхан, ЭТТ ХК-ний захирал асан Б.Ганхуяг нарын 11 хүнийг Авлигатай тэмцэх газраас шалган, хэргийг нь өнгөрсөн наймдугаар сард прокурорт шилжүүлснээр шүүхэд шилжсэн юм. Хэргийн тухайд гэвэл Т.Аюурсайханыг гэмт бүлэглэл байгуулсан, үндэслэлгүйгээр хөрөнгөжсөн, албан тушаалын байдлаа хэтрүүлсэн зэрэг үндэслэлээр буруутган яллаж байгаа бол Б.Ганхуягийг албан тушаалын байдлаа урвуулан ашигласан, үндэслэлгүйгээр хөрөнгөжсөн гэж яллаж буй. Шүүх хурал тодорхой шалтгааны улмаас нийтдээ ийнхүү таван удаа хойшилж, он дамжин шүүж байгаа юм.
