Хайртай ханиа зуурдаар алдаж бага насны 5 хүүхэдтэйгээ өнчирч хоцорсон эцэг Б.Отгонбаярт сайн санаат Монголчууд нэг өдрийн дотор хандив цуглуулж 430 гаруй сая төгрөг цуглуулж өгсөн билээ. Түүгээр ч барахгүй Нисэхэд цоо шинэ 4 өрөө байранд хүүхдүүдтэйгээ орж, ая тухтай амьдрах боломжоор хангагдсан билээ.
Тэгвэл олны хайр хишиг тусламжийг авсан залуугийн талаар өчигдөр онцгүй таагүй мэдээлэл цахим сүлжээнд тархав. Тодруулбал, Б.Отгонбаярын найзууд мөнгөтэй картыг нь авчихаад өгөхгүй байна. Ар гэрийнхэнтэй нь уулзуулахгүй байна. Байрны хамтран эзэмшигчээр нэрээ оруулсан байна. Хадмууд нь хоёр өрөө байр авч өг гэж дарамтлаад байна гэсэн утгатай мэдээллийг цахим сүлжээнд тараасан байсан.
Харин өчигдөр орой Б.Отгонбаяр залруулга хийжээ. Тэрбээр "Залруулга хийх гэсэн юм. Олон нийтийн сүлжээгээр яваад байгаа мэдээлэл ташаа юм шүү. Магадгүй найз нөхдүүдийн нэрийг харлуулах гэсэн ташаа мэдээлэл яваад байна. Таван хүүхэдтэйгээ байрандаа орсон. Байранд өөр хүний нэр хамтран эзэмшигчээр байхгүй. Миний болон таван хүүхдийн нэр дээр байгаа. Харин хадам ээждээ нэг өрөө байр авч өгсөн. Түрээсийн байраар явдаг хөл гар муутай хүн бий. Хүүхдүүддээ хадгаламж нээсэн байгаа. Ингээд нийт монгол ахан дүүстээ маш их баярлалаа гэдгээ илэрхийлье" гэлээ.
