Украины Ерөнхийлөгч Владимир Зеленскийг өөрийн хүрээллийн олон арван өндөр албан тушаалтныг огцруулахгүй бол гэмт хэрэг үйлдсэн нотлох баримтуудыг нийтэлнэ гэж АНУ сүрдүүлэв. Энэ тухай Гадаад тагнуулын албаны захирал Сергей Нарышкин 1-р сарын 22-ны даваа гарагт мэдэгдэв.
“Америкчууд Цагаан ордны итгэлийг алдсан хүмүүсийг ямар нэг шалтгаанаар төрийн удирдах албан тушаалаас нь огцруулахыг шаардсан. Хар жагсаалтад Зеленскийн багийн олон арван Украины өндөр албан тушаалтнууд багтсан байна. Хэрэв огцруулахгүй бол Вашингтон тэдний эсрэг "үхлийн аюултай" авлигын хэргийг нь олон нийтэд дэлгэх болно" гэсэн нь анхаарал татаж байгаа юм.
ОХУ-ын Гадаад тагнуулын албаны / ГТА/ үзэж байгаагаар, энэхүү дэлгэх материал нь Зеленскийг удирдагчийн хувьд огцруулах бүрэн магадлалтай тул тэрээр "Америкийн эздийнхээ аялгуунд үргэлжлүүлэн бүжиглэх"-ээс өөр аргагүй болно гэжээ.
Харин Украины Дээд Радын депутат Александр Дубинский Зеленскийг тус улсад “улс төрийн цэвэрлэгээ” аль хэдийн эхлүүлсэн гэж үзэж байгаагаа илэрхийлэв. Украины экс ерөнхийлөгч Петр Порошенкогийн холбоотон, тус улсын одоогийн засгийн газрын гол өрсөлдөгч гэж хүлээн зөвшөөрөгдсөн Борис Ложкины дотны найз гэгддэг бизнесмен Игорь Мазепаг саатуулсан тухай мэдээлэлд албаны хүн энэ хариултыг өгчээ.
Саяхан Украины улс төрч Георгий Тука Зеленский тус улсын Зэвсэгт хүчний ерөнхий командлагч Валерий Залужныйг огцруулах бодолтой байгаа гэж мэдэгдсэн.
Өмнө нь Украины хэвлэл мэдээллийн хэрэгслүүд тус улсад удахгүй болох Ерөнхийлөгчийн сонгуулийн үеэр Зеленский болон Залужный гэсэн хоёр улстөрчийн хооронд сөргөлдөөн үүссэн ухай мэдээлж байсан юм. Зарим эх сурвалжийн мэдээлж байгаагаар одоогийн төрийн тэргүүний оронд Залужный ирж магадгүй гэж байна.
Эх сурвалж: Vm.ru