Өчигдөр буюу Мягмар гарагийн өглөө Кремлийн эсрэг сайн дурын зэвсэгт бүлэглэлүүд Украины нутгаас Оросын хилийн Белгород, Курск мужуудын нутаг руу довтолж эхэлснийг тал талын эх сурвалжууд мэдээлжээ.
Оросын орон нутгийн удирдлагууд “хорлон сүйтгэгчдийн хил давах оролдлого бүтэлгүйтсэн” тухай мэдээлсэн байна.
Гэхдээ Телеграм сүлжээнд хуягт тэрэгнүүд хил орчмын тосгод руу орж ирж буйг харуулсан, цаана нь буун дуу сонсогдсон дүрс бичлэгүүд тарсан байна.
<script async src="https://telegram.org/js/telegram-widget.js?22" data-telegram-post="moscowtimes_ru/20039" data-width="100%"></script>
Украины талд тулалдаж буй Оросын Эрх Чөлөөний Легион, Оросын Сайн Дурын Корпус зэвсэгт бүлэглэлүүд хилийн дээс давж, довтолж эхэлснээ тус тусын сувгаар мэдээлжээ.
Тухайлбал Оросын Эрх Чөлөөний Легион бүлэглэл Курск мужийн Тёткино тосгонд Оросын армийн хуягт тэргийг устгаснаа мэдээлсэн юм.
Оросын Сайн Дурын Корпус бүлэглэл ажиллагааныхаа явцын талаар удахгүй мэдээлэл өгөхөө амлажээ.
Холбооны Аюулаас Хамгаалах Алба (ФСБ) зэвсэгт бүлэглэлүүд Ням гарагаас хойш хил давахыг оролдож байгаа ч одоогоор амжилт олоогүй гэж мэдээлснийг Оросын төрийн төв хэвлэл уламжилсан байна.
“Дайсны 100 гаруй бие бүрэлдэхүүн, зургаан танк, Цезарь өөрөө явагч их буу, 20 хуягт машин зэргийг устгасан” гэж ФСБ-ийн мэдэгдэлд өгүүлжээ. Гэхдээ энэ нь зөвхөн Мягмар гарагийнх, эсвэл өмнөх өдрүүдийг хамарсан тоо эсэх талаар тодорхой мэдээлэл өгөөгүй байна.
Сүүлд Украины цэргийн тагнуулын алба (ГУР) Оросын сайн дурын зэвсэгт бүлэглэлүүд Киевийн эрх баригчдын оролцоогүйгээр бие даан ажиллагаа явуулж буйг баталжээ.
“Тэд ОХУ-ын нутаг дэвсгэрт цэвэр бие даасан ажиллагаагаа өөрийн улс төр, нийгмийн хөтөлбөр зорилтын дагуу хэрэгжүүлж байгаа” гэж ГУР-ын хэвлэлийн төлөөлөгч Андрей Юсов хэвлэл мэдээллийн төлөөлөгчдөд хэлсэн байна.
Өнгөрсөн онд Украиныг дэмжигч Оросын зэвсэгт бүлэглэлүүд хэд хэдэн удаа хил дамнасан ажиллагаа явуулж байв. Тэдгээрээс хамгийн их хохирол учруулсан ажиллагаа нь зургаадугаар сард Белгород мужийн Шебекино тосгоны орчимд болж байжээ.
Эх сурвалж: The Moscow Times
