Оросын армийн ачаа тээврийн нисэх онгоц өчигдөр үдээс хойш нийслэл Москвагаас зүүн хойд зүгт Иваново мужийн нутаг дэвсгэрт осолджээ.
Нэг хөдөлгүүр нь шатаж буй Ил-76 онгоц аажмаар унаж байгааг харуулсан дүрс бичлэгүүд өчигдөр Оросын сошиал ертөнцөд тарсан юм. Онгоц газарт унасны дараа дэлбэрч, өтгөн хар утаа олгойдож буйг харуулсан гэрэл зураг мөн таржээ.
https://t.me/tvrain/75891?single
Энэ ослын талаар ОХУ-ын батлан хамгаалах яам “Москвагийн цагаар 13:00 цагийн орчимд хуваарьт нислэгээ үйлдэхээр хөөрсөн цэргийн ачаа тээврийн Ил-76 онгоц Иваново мужийн нутагт осолдлоо. Газар дээрээс нь авсан мэдээллээр хөөрөх үеэр хөдөлгүүрүүдийн нэгд гал гарсны улмаас осол болсон байна” гэж мэдэгдсэн юм.
Онгоцонд нислэгийн багийн найман гишүүн, долоон зорчигч явжээ.
Батлан хамгаалах яамны мэдэгдэлд хүний амь хохирсон эсэх талаар огт дурдаагүй байна. Харин онцгой байдлын албаны эх сурвалж онгоцонд явсан 15 хүн бүгд амиа алдсаныг баталсан тухай ТАСС агентлаг сүүлд мэдээлжээ.
Энэ оны нэгдүгээр сард Оросын армийн өөр нэг Ил-76 онгоц Украинтай хил залгаа нутагт осолдсон юм. Оросын эрх баригчид уг онгоц Украины 65 олзны цэргийг тээвэрлэж байсан гэж тухайн үед мэдээлж байв.
Сүүлийн осол гарсан Иваново муж нь Украины хилээс 700 гаруй километрийн зайд оршдог.
Эх сурвалж: AFP
