Лхагва гарагт ОХУ-ын ерөнхийлөгч Владимир Путин төрийн төв хэвлэлд өгсөн ярилцлагадаа “Орос улс техникийн хувьд цөмийн дайнд бэлэн, АНУ цэргээ Украинд илгээвэл сөргөлдөөн ноцтой түвшинд өргөжсөнд тооцно” гэх зэргээр ярьсан юм.
Үүний дараа Цагаан ордны хэвлэлийн төлөөлөгч Украины дайны турш цөмийн зэвсгээр сүрдүүлж, хариуцлагагүй зүйл ярьж буй түүнийг хатуу шүүмжилж байв.
Тэгвэл Кремлийн хэвлэлийн алба өчигдөр Путин цөмийн зэвсгээр Өрнөдийг сүрдүүлээгүй, Америкийн хэвлэлүүд хэлсэн үгийг нь гуйвуулсан гэж тайлбарлажээ.
“Энэ бол зориудаар утгыг нь гуйвуулсан явдал. Путин ярилцлагадаа цөмийн зэвсэг хэрэглэх талаар сүрдүүлээгүй. Ерөнхийлөгч зөвхөн цөмийн зэвсгийн хэрэглээг зайлшгүй болгож болох шалтгаануудын талаар ярьсан” гэж Кремлийн хэвлэлийн албаны дарга Дмитрий Песков сэтгүүлчидтэй уулзахдаа мэдэгдсэн байна.
Тэрбээр цааш нь тайлбарлахдаа “Уг асуудал манай холбогдох бичиг баримтуудад тодорхой тусгагдсан байдгийг дэлхий даяараа сайн мэднэ. Хэдийгээр мөргөлдөөний үеэр янз бүрийн нөхцөл байдал үүсэж байсан ч тактикийн цөмийн зэвсэг хэрэглэх (Украинд) санаа хэзээ ч толгойд нь орж ирж байгаагүй гэсэн түүний үгийг Өрнөдийнхөн зориуд анзаараагүй царайлж байна. Энэ бол нөхцөл байдлыг зориудаар гуйвуулж, ерөнхийлөгч Путинийг сонсохыг хүсэхгүй байгаагийн илрэл юм” гэж хэлжээ.
Эх сурвалж: Reuters
