"Miss Universe-2024" -ийн ялагчаар Дани улсын Виктория Кьяр Теилвиг тодорчээ. Тэрбээр тус тэмцээнд түрүүлсэн хамгийн анхны Дани бүсгүй болж байна. Өдгөө 21 настай, бүжигчин, энтрепренёр, хуульч мэргэжилтэй Виктория Мехико хотод болсон гоо бүсгүй шалгаруулах тэмцээнд 120 гаруй орны мисс бүсгүйчүүдтэй өрсөлдөж, Бямба гаригт "Miss Universe-2024" титмийн эзэн болжээ. Өнгөрсөн Пүрэв гаригт үндэсний хувцсаараа гоёж, өрсөлдсөн бүсгүйчүүдээс 30 нь хагас шигшээд шалгарсан байна. Эдгээр мисс бүсгүйчүүд дараа нь усны хувцастай төрөлд загварын алхалт хийж, 12 бүсгүй финалд оролцох болсон байна.
Гэсэн хэдий ч, эцсийн шатанд таван оролцогч үлдсэн бөгөөд "Хэн ч чамайг шүүхгүй бол яаж амьдрах байсан бэ?" зэрэг асуултад хариулсан. Энэ үед Виктория "Би юуг ч өөрчлөхгүй байх байсан. Би өдөр өдөртөө амьдардаг" гэжээ.
"Miss Universe" тэмцээн 72 жилийн өмнө анх зохиогдож, одоог хүртэл үргэлжилж байна. Энэ жилийн хувьд 28 наснаас дээш насны бүсгүйчүүд оролцох эрхтэй болсноороо онцлог юм. Эцсийн шатанд шалгарсан 20 гаруй бүсгүйчүүд бүгд өмнөх жилүүдэд зөвшөөрөгдөж байсан насны хязгаарыг давсан байжээ. Тухайлбал, Мальтагийн Беатрис Нжоя 40 настай ч финалд шалгарсан юм. Тэмцээнд оролцох насны хязгаарыг өөрчилснөөр орчин үеийн эмэгтэйчүүдэд илүү их боломж олгож байна гэж шүүгчдийн баг сайшааж буй.
Мөн "Miss Universe" байгууллага жирэмсэн эмэгтэй, ээж, гэрлэсэн болон салсан эмэгтэйчүүдийг тэмцээнд оролцуулахгүй байх хоригоо цуцалсан байна.
ЭХ СУРВАЛЖ: CNN
