Гурван үе дамжин Малайзын Засгийг барьсан тус улсын Ерөнхий сайд асан Нажиб Разак улсынхаа баялгийн сангийн мөнгийг албан тушаалаа ашиглан хувьдаа завшсан хэргээр өдгөө ял эдэлж буй.
Малайзын шүүх түүнд өнгөрсөн жилийн өдийн 12 жил хорих ял оноосон.
Ноцтой нь түүнийг шүүх үеэр баялгийн сангаасаа завшсан мөнгөнөөс 40 мянган ам.доллар буюу 51.7 тэрбум төгрөгийг Ерөнхий сайд асан Сүхбаатарын Батболдын хүү Баттүшигийн данс руу шилжүүлсэн нь ил болов.
Улмаар Малайзын шүүх тус мөнгөн гүйлгээний учрыг нэхэж, Монгол Улсын Гадаад харилцааны яам руу албан бичиг явуулсан гэх мэдээлэл байдаг. Харин яг хэзээ, юу гэсэн албан бичиг хэнээр дамжуулан явуулсан хугацаа нь тодорхойгүй.
Мөн уг асуудлыг С.Шаарийбуу хэд хэдэн удаа сануулж, хууль хяналтын байгууллагынхан шалгаж, тодруулах ёстойг хэлж буй.
Учир нь Б.Баттүшигийн данс руу мөнгө шилжүүлсэн гэх Малайзын Ерөнхий сайд асан Нажиб нь 19 жилийн өмнө Ш.Алтантуяа гэх монгол эмэгтэйг хэрцгийгээр хөнөөх үүрэг өгсөн гэх зангилаагаар уг хэрэгт холбогддог нэгэн.
Харин Ш.Алтантуяагийн аав нь С.Шаарийбуу.
Тэрбээр өнгөрсөн 19 жилийн хугацаанд охиныхоо хэргийг илрүүлэхээр уйгагүй зүтгэсний эцэст Нажибын тушаалаар охиныг нь хөнөөсөн гэх Малайзын цагдаагийн албаны хоёр хүнд ял үүрүүлж чадсан ч ял бүрэн хэрэгжээгүй. Ял хэрэгжихгүй байх хууль зүйн орчныг нь Монгол Улсын Гадаад харилцааны сайд байсан Л.Болд тавьсан байдаг.
Хэргийн дэлгэрэнгүй процессыг ЭНД дарж харна уу.
Үүнээс гадна Малайзын Ерөнхий сайд асан Нажиб Разак нь хууль бусаар хувьдаа завшсан мөнгөнөөс Монголын Ерөнхий сайд байсан Сү.Батболдын хүү Б.Баттүшигийн данс руу илгээсэн учрыг нь тайлбарлана уу гэх албан бичгийг Малайзын шүүх С.Шаарийбуугийн тус улс дахь өмгөөлөгчөөр дамжуулан Монгол руу явуулжээ.
Түүнчлэн уг шилжүүлэг нь явсаар Ш.Алтантуяагийн аллагын хэргийн мөрдлөгт 19 жилийн турш Монгол Улс нэг ч удаа дэмжлэг үзүүлж байгаагүйн нэг шалтгаан байх магадлал ч бий. Учир нь Монголын талаас Ш.Алтантуяагийн хэргийн захиалагчаар шүүгдэж байсан Нажибын зөвлөх “Багинда гэх хүнд битгий хэрэг үүсгээрэй” гэх бичгийг Малайзын шүүхэд илгээсэн байдаг.
Тиймээс С.Шаарийбуу Сү.Батболд гэдэг хүн Нажибид ямар тус хүргэснийхээ төлөө их хэмжээний мөнгө авав гэдэг асуудлыг шалгуулахаар хууль хяналтын байгууллагад сануулсаар байж болох талтай.
Мөн уг асуудлыг Сү.Батболд болон түүний хүү няцааж, албан ёсны хариулт өгөөгүй. Цаашлаад Монгол Улсын Гадаад харилцааны яам, Авлигатай тэмцэх газар, Хууль зүй, дотоод хэргийн яам гээд аль аль шалгаагүй дүр зурагтай байна.
Эдгээрээс гадна Малайзын шүүхээс ирсэн гэх дээр дурдагдсан албан бичиг хэн сайдын үед Гадаад харилцааны яаманд ирж, хэн хав дарав гэдэг асуудал анхаарал татаж байна.
Иймд Малайзын шүүхээс тайлбар нэхэмжилж Монгол руу явуулсан тус албан бичгийн он цагийг хөөж үзэв.
Албан бичиг сонгуулийн өмнө буюу өнгөрсөн 2024 оны тавдугаар сард Монгол Улсын Гадаад харилцааны яаманд цахим шуудангаар иржээ.
Бичигт “2011-2012 онд Монгол Улсын Ерөнхий сайд асан Малайзын Ерөнхий сайд одоо хэрэгтэн болоод байгаа Нажиб Разакаас агуулга зорилго нь тодорхойгүй их хэмжээний мөнгө авсныг Малайзын шүүх тогтоогоод байна. Энэ нь Нажибын шоронд хоригдох шалгаан болоод буй "Малайзын баялаг"-ийн санг хоосолсон хэрэгт хамтарсан үйлдэл болсон гэмээр. Эл шилжүүлэг цаг хугацаа хамтарсан үйлдлээрээ уг хэрэгтэй давхцаж байна гэж Малайзын шүүх сэжиглэж байна. Тиймээс энэ шилжүүлгийн талаар тайлбар илүүлнэ үү” гэсэн байжээ.
Харин яамны сайдаар Б.Батцэцэг ажиллаж байсан байна. Улмаар тус албан бичгийн нэг хувь С.Шаарийбууд үлдсэн бол эх хувь нь Гадаад харилцааны яаманд үлдсэн байна. Гэвч уг албан бичиг яамнаас гаралгүй хав дарагдаад 10 сар болжээ.
Уг нь гадаадад монгол иргэдээ хамгаалах, туслалцаа үзүүлэх үндсэн үүрэгтэй Гадаад харилцааны яам өдгөө хэрцгийгээр алуулсан эгэл ардын хэргийг дарахдаа сайн ажиллаж, эрх мэдэлтнээс хариуцлага шаардсан албан бичигт хариулахдаа чимээгүй алга болдог газар болж хувирсан баримт бүхий жишээ энэ.
Энэ бүхнээс дүгнэхэд бид яамны ажлаа зөвхөн айлчлал гэж андуурсан сайдтай. Гаднын улсад иргэнээ хамгаалдаггүй Гадаад харилцааны яамтай улс болжээ.
Д.ЖАРГАЛМАА
https://eguur.mn/575395/
