Боловсролын зээлийн сангийн хөрөнгийг хулгайн замаар авч, олон хүн гадаадад суралцсан гэх мэдээлэл гараад даруй дөрвөн он дамнажээ. 2023 онд энэ сангаас зээл авсан хүмүүсийн мэдээллийг хуулийн дагуу олон нийтэд ил болгосон талаар салбарын сайд асан Л.Энх-Амгалан мэдэгдэж байв. Тухайн үед гадаадын шилдэг 100 их сургуульд суралцсан 421 оюутны нэр, эцэг эхийн нэр гэх мэт зээлтэй холбоотой мэдээллийг нийтэд ил болгосон. Нийгэмд дуулиан болж, олон нийтийн дунд ардын хүүхэд биш авахаалжтай аав, ээжийн хүүхэд л тус сангаас зээл гэх нэрийдлээр мөнгө авч гадаадад боловсрол эзэмшдэг гэдэг яриа хүртэл гарсан. Одоо ч энэ яриа, цуурхал нийгмээс арчигдаагүй. Учир нь ардын олон хүүхдийн сурах боломжийг хязгаарладаг гол зүйл нь мөнгө. Гэтэл тус сангийн хөрөнгөөр суралцаж, төгсөөд хэдийнэ эх орондоо ирсэн хэрнээ өр төлбөрөө барагдуулдаггүй өчнөөн хүн байгаа нь харамсалтай. Эргэх холбоо, эзэмшсэн мэдлэг боловсролоо бодсон ч авсан зээлээ төлж, эх орныхоо хөгжилд хувь нэмэр оруулах дараагийн суралцагчдадаа үүд нээж өгөх нь энэ сангаас зээл авч сурсан хэн бүхний үүрэг. Тодруулбал, эрх мэдэл, албан тушаалаас хамааралтай боломж авсан эсэхээс үл хамаарч энэ сангийн зээлээ эргэн төлөх шаардлагатай гэсэн үг.
Өнөөдрийн байдлаар, БЗС-гаас зээл авч гадаадад сурсан 1121 иргэний 200 тэрбум, дотоодод сурсан 13 мянга орчим иргэний 14 тэрбум төгрөгийг эргэн төлүүлэхийн тулд Монголбанкы мэдээллийн санд нийлүүлэх бэлтгэл ажил хийгдэж байгаа аж.
Зээлдэгчдийн мэдээллийг энэ сардаа багтааж төв банканд нийлүүлнэ гэдгийг Боловсролын зээлийн сангийн ажлын албаны дарга О.Сийлэгмаа мэдээлсэн. Угтаа бол боломж хүртэж, зээлийн сангийн мөнгөөр суралцагчид ийм мэдэгдэл гаргахад хүргэсэн нь увайгүй үйлдэл. Олон улсын нэр хүндтэй их, дээд сургуульд суралцаж ирсэн атлаа хуулийн байгууллагад, нэмээд Монголбанкны зээлийн мэдээллийн санд хуваарьт төлбөрөө төлөөгүй этгээдээр бичигдэх нь ёс зүйн хувьд ичмээр үйлдэл.
ХУУЛИЙН БАЙГУУЛЛАГАД ӨГӨӨД Ч НЭМЭРГҮЙ ХҮМҮҮСТ ДАХИН ЗЭЭЛ ОЛГОХГҮЙ БАЙХ НЬ ЗӨВ
Өнгөрсөн оны арваннэгдүгээр сард Боловсролын зээлийн сангийн санхүүжилтээр 1998-2016 онд дотоод, гадаадын их, дээд сургуульд суралцаж төгссөн зээлийн барьцаанд диплом нь хадгалагдаж байгаа, зээлээ төлөөгүй төгсөгчдийн мэдээллийг хуулийн байгууллагад шилжүүлсэн байна.
Гэвч зээл авч сурсан төлбөрөө иргэд төлөхгүй байгаа учир зээлийн мэдээллийн сан руу шилжүүлж буй.
Зээлийн мэдээллийн санд мэдээлэл нь шилжихээс өмнө төлөлтөө хийсэн тохиолдолд мэдээллийг шилжүүлэхгүй гэсэн байна. Боловсролын зээлийн сангаас зээл авч дээр заасан хугацаанд суралцсан ч гэсэн дараах нөхцөлд зээл чөлөөлөгдөх аж. Үүнд:
- 2004-2007 онд дипломын болон бакалаврын боловсрол эзэмшиж Засгийн газрын 2008 оны 178 дугаар тогтоолын шалгуур Диплом олголт-Боловсролын зээлийн сан (https://elf.gov.mn/диплом-олголт) хангасан бол зээлээс чөлөөлөгдөх боломжтой аж.
Зээлээс чөлөөлөгдөх шалгуур хангасан бол баримт материалыг бүрдүүлэн ирж диплом авах, зээлийн мэдээллээ регистрийн дугаараараа Боловсролын зээлийн сангийн цахим хуудасны дипломын лавлагаа хэсгээс мөн харах боломжтой байна. Харин цагдаагийн байгууллагад бүртгэгдэж, хууль ёсны хариуцлагаа ухамсарлахгүй байгаа этгээдийг төв банкны зээлийн мэдээллийн санд оруулаад зогсохгүй дахин нэг ч төрлийн зээл авах боломжгүй болгох нь зүйтэй гэдгийг иргэд хэлж байна.
News.mn
