УИХ-ын нэгдсэн чуулганы хуралдаанаар Монгол Улсыг 2021-2025 онд хөгжүүлэх таван жилийн үндсэн чиглэл, Монгол Улсын Засгийн газрын 2024-2028 оны үйл ажиллагааны хөтөлбөрийн 2024 оны гүйцэтгэлийн тайлан болон Монгол Улсын хөгжлийн 2024 оны төлөвлөгөөний гүйцэтгэлийн тайланг үргэлжлүүлэн хэлэлцэж байна.
Энэ үеэр УИХ-ын гишүүн П.Сайнзоригийн асуултад хариулах үеэрээ УИХ-ын гишүүн, Монгол Улсын Сайд, ЗГХЭГ-ийн дарга Н.Учрал: "Одоо хөдөө орон нутгаар үндэсний баялгийн сангаа иргэддээ авчиръя, 34-50 хувиа авъя гээд Монгол Улсын Ерөнхийлөгч асан Х.Баттулга яриад явж байна. Үгээрээ бус үйлдлээрээ үзүүлэх хэрэгтэй. Тантай нэр холбогддог Төгрөг нуурын ордыг ярих цаг ирсэн. 39 стратегийн ордыг ярихаар бүгдээрээ үүнийг ярьж байгаа. Тавантолгойн бүлэг ордын 50 хувь 3 тэрбум тоннын нөөцтэй 15 их наяд төгрөг зөвхөн тусгай АМНАТ-ийн 5 хувиар бодвол ард түмэнд ирэх ёстой байсан орд.
Улаанбаатар хотоос 1 цаг яваад очдог ордыг 250 сая ам.доллараар дөрвөн гадаадын иргэнд зарсан. Хонконгийн сайт дээр байна, оффшороор дамжуулаад гаргасан. Үүнийг хэлэлцэх юм уу. Эсвэл ялгаж аваад хэлэлцээр хийх юм уу.
Тэгвэл гучин есөн стратегийн орд дээр хэлэлцээр хийе. Тийм учраас би Монгол төрийн тэргүүн байсан хүн үгээрээ бус үйлдлээрээ хийж харуулаасай гэж хүсэж байна. Е-Мongolia дээр байгаа 138 мянган төгрөгийг яаж нэмэгдүүлэх вэ гэж ажлын хэсэг үйлээ үзэж байна” гэв.
С.Сарнай
