Ардчилсан намын 35 жилийн ой өчигдөр 4-р сарын 7-нд болов.Үүнтэй холбоотойгоор АН-ын Үндэсний бодлогын хороо хуралдаж, ШИНЭ намыг АН-тай нэгтгэх, АН-ын Ерөнхий Нарийн Бичгийн Даргыг сонгох зэрэг асуудлыг хэлэлцэж батлав.

Уг хурлын үеэр лайвчин гэгдэх Д.Мөнх-Эрдэнэ хуурай агсам тавьж, хурлыг үймүүлэх гэж оролдсон юм.

Д.Мөнх-Эрдэнэ энэ үеэрээ: "АН-ын дарга Гантөмөр өнөөдөр генсекээрээ өөрийн халаасны ард түмэн хүлээн зөвшөөрөөгүй хэн ч биш нөхрийг томилсон. Энэ Ганнибал гэдэг хүн сонгуульд өрсөлдөөд гарч ирээгүй хүн.

Өөрөөр хэлбэл өвдөг шороодсон. Өвдөг шороодсон хүний хийморь лундаа гутранги байдаг. Тэгвэл давдаг ялдаг ийм генсектэй баймаар байна.

Энэ Үндэсний бодлогын хороонд өөр чадварлаг мундаг залуучууд зөндөө байгаа. Тэр утгаараа нам өөрөө байнга шинэчлэгдэж байх ёстой. Харин чадахгүй бол зайгаа тавьж өгөх ёстой." гэсэн шаардлага тавьж байлаа.

Гэвч түүний шударга мэт шаардлагын цаана хувийнх нь эрх ашиг л байсан гэнэ.

Бүр тодруулбал УИХ-ын 2024 оны сонгуулийн өмнөөс л Д.Мөнх-Эрдэнэ сонгуулийн дараа АН-ын Ерөнхий Нарийн Бичгийн дарга болмоор байна гэх хүсэлтээ АН-ын дарга Лу.Гантөмөрт хэлж байсан аж. Учир нь АН-ын ЕНБДаргын үүрэг гүйцэтгэгч Э.Одбаяр намын жагсаалтаар УИХ-д сонгогдох нь тодорхой байсан, иймээс ч Д.Мөнх-Эрдэнэ намынхаа генсек болно гэдэгт бүрэн итгэлтэй байсан гэнэ. Гэвч Лу.Гантөмөр түүнийг бус УИХ-д өрсөлдөөд ялагдсан Н.Ганнибалыг АН-ын ЕНБДаргын үүрэг гүйцэтгэгчээр томилж, өчигдөр жинхлэв. Иймээс л АН-ын ЕНБДарга болох санаатай байсан Д.Мөнх-Эрдэнэ өчигдөр бухимдлаа гаргасан бололтой.

С.Сарнай