Сүлжсэн үсээ ардаа боосон нүдний шилтэй залуу шарласан мододтой гудамжинд дуулж алхана.

Сонсох нь ээ,

“Ахиад л энэ гудамжинд намар иржээ

Алхах зам дээр шар навчис хөглөрчээ

Яг энэ өдрийг хайрт минь санаж байна уу.

Яг энэ үдэш гараас чинь хөтөлсөн...” гэж дуулна. “Энэ бол хайр” дууг хэдийнэ сонссон үзэгчид бол түүнийг хэн гэдгийг мэдсэн байх.

Дуучин Г.Эрдэнэбилэгийг бид “Дижитал” хамтлагаас эхлэн мэдэх билээ. Томдсон өмд, цамц, саравчтай малгайтай залуус хип хоп дуулаад л ерээд оны сүүлчээр ид хит болж байсан даа. Тэгэхэд тэдний дундаас цойлон гарч ирсэн хамтлаг бол “Дижитал”. Хамтлаг байгуулагдсанаас хоёр жилийн дараа буюу 2001 онд Эрка гишүүнээр нь орж байжээ. Хамтлагийн гишүүд анхны дуундаа бооцоо тавьж, “Энэ дуу хэрэв хүмүүст хүрэхгүй бол хамтдаа дуу хийхээ больж, өөр өөрсдийн уран бүтээлээ хийе” гэж ярилцаж байсан гэдэг. Тэр нь анх гарсан цагаасаа хойш өнөөдрийг хүртэл хит болсоор байгаа “Цасан будрах өвлийн үдэш Би чам дээр очно доо Царайлаг төрсөн чи минь харин Инээмсэглэн ирнэ дээ” гэх “Чамдаа” дуу. Түүнээс хойш “Галзуу ганц”, “Өнчин нулимс” “Хүүгээ өршөө”, “Гандан буурахгүй” зэрэг олон хит дуу төрүүлж, залуусын дунд хоногшин үлдэж чадсан. Анх байгуулагдсан цагаасаа олон хүний дурсамж, хайрыг дуугаараа хөглөн бүтээж яваа домогт хамтлагийн уран бүтээлийг одоо ч сонсоход дотно дулаан, өсвөр насны жаргалтай үеүдэд хүргэдэг. Цас орохоор чихэвчээ тултал чангалаад “Чамдаа” дууг сонсон алхахад одоо ч сэтгэл догдлом санагддаг.

МЭДРЭМЖЭЭ ДЭЛГЭГЧ

Тэгвэл хамтлагаасаа дутахгүй хит дуутай, рок попын уран бүтээлч дотроо уран бүтээлийн дархлаатай нэгэн бол Эрка. Хүний сэтгэлийн дотор эгнэн орших олон дурсамжаас хамгийн нарийн нандин, онцгой, мартагдашгүйг нь тэр ингэж дуугаараа “сугалан” татаж, эрхгүй өнгөрсөн рүү нь хөтлөн очиж, хөглөн дуулдаг. Бүхий л бие, сэтгэлээрээ дуугаа мэдэрч, тэр мэдрэмжээ харамгүй дэлгэж, хуваалцдаг болохоор дууг нь сонссон хүн нэг мэдэхэд л автаж, эргэн дурсаж, санааширч, инээвхийлж, магад үймэрч суудаг. Өөрөө ч тэр “Мэдрэмж бол миний хувьд их чухал. Хаана ч явсан өөрт төрсөн мэдрэмжээ барьж, биежүүлж, түүнийгээ зүрх сэтгэлдээ гүнзгий суулгаснаар үг бичигдэж, аялгуу төрж бүтээл амилдаг” гэнэ. Түүний тэгж мэдэрсэн бүтээлийг бид өөр өөрсдийн мэдрэмж, дурсамжаар өлгийдөн сонсож, зүрх сэтгэл рүүгээ өнгийдөг. Эркагийн өөр нэгэн имиж бол саравчтай малгай, хар нүдний шил. “Чамайг санасаар” дууг нь сонсоогүй хүн бараг байхгүй болов уу.

“Алдсан ч бид нэг нэгнээ хайрласаар байна

Ахиад эхэлбэл болох уу

Яаж аргадах вэ

Яаж ойлгуулах вэ

Амьдралыг чамтай хамт туулмаар байна...” гэх үгтэй бүтээлээрээ тэр олон хүний хэлж зүрхлээгүй үгийг хэлж, хайртай хүнээ гомдоочихоод яаж уучлалт гуйх учраа олохгүй яваа хүмүүст тэр дуугаараа дамжуулан хүргэж чадаж байгаа. Дуугаараа сэтгэлээс сэтгэлийн хооронд гүүр “барьж” чадаж байна гэдэг л тухайн уран бүтээлчийн бүтээлийн чанар чансааг илтгэх болов уу.

Цаашлаад,

“Аз жаргалтай байгаарай, хайрт минь

Намайг дурсаад инээгээрэй, чи минь

Битгий уйлаарай, эмзэгхэн минь

Зүрхэнд үлдсэн хамгийн нандин дурсамж минь...” гээд хамгийн хайртай хүнээ явуулж чадаж ч байна. Дижиталын Эркаг ийм онцлогтой, хамаг сэтгэлээ дуундаа шингээсэн уран бүтээлч юм уу гэж хардаг юм. Өөрийн гэсэн өнгө аяс уран бүтээлчээс ингэж л төрж, түүнийх гэсэн зүйлд нь бид татагдан дууг нь сонсдог байх нь. Шинэ уран бүтээл нь гараад л нийгэмд тэсрэлт хийж, хэн бүхнийг гуниг, ганцаардал, догдлолтой хайрын дурсамж руу нь хөтөлдөг. Харин хэний ямар дурсамжийг аль дуу нь хөтөлж байна вэ гэдгээрээ өөр. Сонсогчийн хувьд би эхлэлд дурдсан дууг намрын улиралд сонсох дуртай. Хэн нэгэнтэй хамт зогсож байсан гудамж гэхээс илүү бага нас, хамгийн сайн найзтайгаа нандин зүйлсээ ярилцан сууж байсан ахуйн дурсамж хүртэл эл дуугаар хөглөгддөг. Дууг нь сонсоод л дотроосоо дурсамжаа нэг нэгээр нь хөвөрдөөд, цаг хугацааг ухрааж, өнгөрсөн рүү бодол санаагаараа хүрч очиж, нэг догдолж, баярлаж, эсвэл уйлж, багахан харамсана. Түүний дуунд ийм нэг увдис, чадал шингээтэй байдаг нь сонсох бүрд мэдрэгддэг.