Ерөнхий сайд Л.Оюун-Эрдэнэ УИХ-д итгэл хүлээлгэх тогтоолын төслийг оруулах нь тодорхой болов. Тэрээр өнөөдөр тогтоолын төслөө УИХ-д өргөн барьж, энэ 7 хоногт хэлэлцүүлэх юм байна.

Үндсэн хуульд Ерөнхий сайд өөрөө УИХ-д итгэл хүлээлгэх тогтоолын төсөл өргөн барих хуулийн заалт бий. Тус заалт 1992 оны Үндсэн хуульд байсан бөгөөд 2019 оны өөрчлөлтөөр процессыг нь нарийвчлан тусгасан талаар бид өмнө нь мэдээлсэн. Энд дарж уншина уу.

Засгийн газарт итгэл үзүүлэх санал хураалтыг нууцаар явуулах ёстой. Тэгвэл Ерөнхий сайд Л.Оюун-Эрдэнэ энэ санал хураалтыг ил явуулах хүсэлтэй байгаа бөгөөд тогтоолын төсөлдөө ил явуулах саналаа тусгах аж. УИХ-ын дэгийн тухай хуульд Засгийн газарт итгэл үзүүлэх тогтоолын төслийн санал хураалтыг явуулах нарийвчилсан дэг байхгүй ч нууц санал хураалтыг зохицуулсан заалт бий.

Тус хуулийн

10.6.Нууц санал хураалтыг санал хураах хуудсаар явуулах бол гишүүдээс бүрдсэн тооллогын комисс байгуулна. Нууц санал хураалт явуулах, дүнг гаргах журмыг тооллогын комисс боловсруулж, хуралдаанд оролцсон гишүүдийн олонхын саналаар батална.

10.7.Нууц санал хураалтыг цахимаар явуулахад санал өгсөн гишүүдийн нэрс хуралдааны цахим системд хадгалагдахгүй гэж заасан.

Ерөнхий сайдын илээр санал хураалт явуулах санал дээр УИХ мөн санал хураалт явуулан шийдвэр гаргана. Засгийн газрын хувь заяатай холбоотой асуудал дээр ил санал хураалт явуулах нь гишүүд итгэл үнэмшлээрээ саналаа өгөх боломжийг хумина. Учир нь УИХ-ын гишүүдийн олонх нь Засгийн газарт итгэл үзүүлэхийг дэмжвэл эсрэг санал өгсөн гишүүд тэр дундаа намын дарга, Ерөнхий сайдынхаа эсрэг санал өгсөн МАН-ын гишүүд цаашдаа улс төрийн дэмжлэг авахгүй байх магадлалтай. Тиймээс санал хураалтыг нууцаар явуулах нь хараат бус, итгэл үнэмшлээрээ санал өгөх боломжийг бүрдүүлнэ.