Испанийн “Барселона” клуб залуу довтлогч Ламин Ямалтай байгуулсан гэрээгээ 2031 оны зургаадугаар сар хүртэл сунгасан тухай Каталоны багийн хэвлэлийн алба мэдээллээ.

“Л.Ямал 15 настайдаа 2023 оны дөрөвдүгээр сарын 29-нд манай багийн бүрэлдэхүүнд анх удаа тоглож байв. Тэр өдрөөс хойш Барселонагаас холгүй орших Матаро хотод төрсөн энэ залуу гайхамшигт тоглолтуудаараа дэлхийн хөл бөмбөгийн тавцанд гарч ирлээ” хэмээн клубийн цахим хуудсанд бичсэн байна.

Өдгөө 17 настай Ямал бол “Барселона”-гийн хөл бөмбөгийн сургуулиар хүмүүжсэн тоглогч юм. Тэрбээр 2024/25 оны улиралд тус багийн бүрэлдэхүүнд Испанийн аварга болж, Испанийн цом, Супер цомын тэмцээнүүдэд түрүүлжээ. Өнгөрсөн улиралд “Барселона”-д 55 удаа тоглохдоо 18 гоол оруулж, 25 оновчтой дамжуулалт өгчээ. Мөн 2023 онд 15 настайдаа Испанийн аварга болж байв. Түүнээс гадна, Испанийн шигшээгийн бүрэлдэхүүнд 2024 оны Европын АШТ-д түрүүлж, тус тэмцээний хамгийн залуу шилдэг тоглогчоор шалгарсан юм. Тэрбээр шигшээ багт 19 тоглолт хийхдээ 4 гоол оруулж, 9 оновчтой дамжуулалт хийгээд байна.

Өнгөрсөн 2024 оны 10 дугаар сард Л.Ямал France Football сэтгүүлийн дэвшүүлсэн хувилбараар дэлхийн шилдэг залуу тоглогчоор шалгарсан бол дараа сард нь 21-ээс доош насны Европын шилдэг хөлбөмбөгчинд Италийн Tuttosport сонины газраас олгодог Golden Boy шагналын эзэн болсон юм.

Хэвлэлүүдэд бичсэнээр, дараагийн улирлаас эхлэн Л.Ямал 10 дугаартай өмсгөлтэй тоглох бололтой. Одоо тэрбээр 19 номертой тоглож байгаа юм. “Барселона”-д янз бүрийн цаг үед 10 дугаартай тоглож байсан хөлбөмбөгчид бол Лионел Месси, Диего Марадона, Роналдиньо, Ривалдо, Ромарио нар юм. Мөн зарим хэвлэлд мэдээлснээр бол, шинэ гэрээний дагуу Ямал жилд 15 сая евро авахаар болсон нь одоогийн цалингаас нь гурав дахин их бөгөөд бонусыг тооцвоос нийт орлого нь 20 сая еврод хүрэх ажээ. Хамгийн сүүлийн үеийн мэдээг дуулгахад, даваа гарагт “Барселона” баг Испанийн цомын тэмцээний финалд “Реал Мадрид”-ыг нэмэлт цагт 3:2-оор хожсон байна.

Б.Адъяахүү