Сүүлийн өдрүүдэд улс төрийн хүрээнд хамгийн их анхаарал татаж буй сэдэв бол Нийслэлийн Засаг дарга бөгөөд Улаанбаатар хотын захирагч Х.Нямбаатарыг огцруулах тухай мэдээлэл юм. МАН-ын лидерүүд, удирдлагууд дотор энэ асуудлыг нухацтай ярилцаж буй гэх мэдээлэл тархаж, нийслэлийн удирдлагын ирээдүйтэй холбоотой тодорхойгүй байдал үүсээд байна.

Гэвч хэрвээ улс төрийн өрнөл Х.Нямбаатарыг огцруулах хэмжээндээ хүрвэл НИТХ-ыг (Нийслэлийн Иргэдийн Төлөөлөгчдийн Хурал) ч мөн тараах шаардлагатай.

Учир нь өнөөгийн НИТХ нь 2024 оны орон нутгийн сонгуулиар бүрдсэн бөгөөд тухайн үед сонгуулийн ирц маш муу, идэвх сул байв. Мөн яг үнэндээ МАН-ын нэр хүндээр бус, Х.Нямбаатарын хувь хүний имиж, танигдсан байдал, тууштай байр суурийн нөлөөгөөр НИТХ-ын олон төлөөлөгч сонгогдсон гэдгийг үл ойшоож болохгүй.

Өөрөөр хэлбэл, өнөөгийн НИТХ дахь МАН-ын олонх үнэндээ Х.Нямбаатарын хүчээр бүрдсэн гэж хэлж болно. Хэрвээ тэрээр огцорвол уг бүтэц, хамаарал ч мөн задрах ёстой. Тиймээс зөвхөн нэг хүнийг золиослоод өнгөрөх бус, системтэйгээр шинэчлэл хийх шаардлага үүснэ.

Х.Нямбаатарыг огцруулах л юм бол МАН-ынхан дахин дээрээс шинэ хотын дарга томилох гэж үзнэ.

Гэтэл Нийслэлчүүд үнэндээ 2024 оны намар Х.Нямбаатар ба түүний багийнханд л итгэсэн. Иймээс ч НИТХ-ыг тарааж, орон нутгийн сонгуулийг дахин явуулж, нийслэлийн сонгогчдын итгэлийг дахин асуух нь зөв. Энэ нь ардчилсан зарчмыг бодитоор хэрэгжүүлсэн алхам байх болно.

Э.Солонго Sonin.mn