“Үндсэн хууль ба хөгжил, дэвшил” сэдэвт Үндсэн хуулийн баталсны 34 жилийн ойд зориулан зохион байгуулсан "Өглөөний цай” - уулзалтын үеэр Монгол Улсын гурав дахь Ерөнхийлөгч Н.Энхбаяр : "Д.Амарбаясгалан дарга Т.Доржханд даргатай нийлээд 126 гишүүнтэй л болчих юм бол Монгол улс сайжирчихна, тэгээд өшөө ганц хоёр нам парламентад нэмээд орчихвол Монгол Улс сайхан болчихно гэсэн ийм гэнэн, явцуу зорилго тавиад тийм л өөрчлөлт хийчихсэн.
Үндсэн хуулийнх нь суурь буруу тавигдсан байсан учраас хүний тоо олон боллоо гээд, 500 гишүүнтэй болсон ч, 50 гишүүнтэй болсон ч ямар ч өөрчлөлт гарахгүй гэдэг нь 2024 оны сонгуулиас хойш 2 жилийн хугацаанд харагдлаа. Мөн дээр нь нэг хоёр нам парламентад нэмж орлоо гээд айхтар өөрчлөлт гарахгүй байна.
Тийм учраас бид намуудыг муулаад, хүмүүсийг муулаад хэрэггүй. Нэгэнт суурь нь буруу тавигдсан учраас сууриар нь засах ёстой гэсэн бодолтой байгаа. Өчигдөр буруу хууль хийсэн бол өнөөдөр хурдан засах хэрэгтэй" гэсэн юм. Хариуд нь Ерөнхий Сайд асан С.Баяр x платформд: " 126 гишүүнтэй, сонгуулийн холимог системээр бүрэлддэг УИХ-тай болсон нь дэвшил. Сонгогчийн санал гээгддэг, хоёр тийш савладаг мажоритар системээс аажим салж буй нь зөв. Гэхдээ ҮХНӨ төгс болоогүй. Үндсэн хуулийн хэмжээнд шийдэх ёстой олон чухал асуудал үлдсэн. НЭ-ын хувилбарыг үзсэн. Өөрөө автоматаар УИХ-д орох хувилбар байсан." гэж бичжээ.
Н.Отгон
