С.Батцэцэг П.Орхоны оронд хүч үзэхээр болов


Чөлөөт бөхийн насанд хүрэгчдийн ДАШТ энэ сарын 20-28-нд Унгар улсын нийслэл Будапешт хотод болох бөгөөд үүнд оролцох байсан Монгол Улсын гавьяат тамирчин П.Орхоны оронд С.Батцэцэгийг сонгожээ.

П.Орхоны хувьд өнгөрөгч наймдугаар сард Индонезийн Жакарта хотод болсон Азийн зуны спортын XVIII наадмын чөлөөт бөхийн эмэгтэйчүүдийн 62 кг-ын жинд өрсөлдөж алтан медаль хүртсэн юм. Гэвч тэмцээний дараа авсан допингийн шинжилгээнд бүдэрч Азийн олимпийн зөвлөл, Азийн наадмыг зохион байгуулах хорооноос Монголын Үндэсний олимпийн хороонд ирүүлсэн бичигт түүний амжилтыг үр дүнгүйд тооцсон билээ. Одоогоор Монгол Улсын Азийн наадамд авсан алтан медалийн тоо тав байсан бол дөрөв болж, 16 дугаар байраас 17 руу ухарсан юм.

Азийн наадмын үеэр П.Орхоноос авсан шинжилгээний сорьцоос хориотой бодис илэрсэн мэдэгдэл Монголын үндэсний олимпийн хороо, Монголын допингийн эсрэг үндэсний төв, Азийн олимпийн зөвлөлийн ерөнхийлөгч, Дэлхийн бөхийн холбоо (UWW), Азийн бөхийн холбоо (AAWC), Дэлхийн допингийн эсрэг агентлаг (WADA) зэрэг байгууллагуудад ирсэн.  Нэг хэсэг спорт сонирхчдыг шуугиалсан энэ асуудал Дэлхийн бөхийн нэгдсэн холбооноос гарах шийдвэрийг хүлээж байгааг албаныхан хэллээ.

Иймээс энэ удаагийн ДАШТ-д оролцох Монгол Улсын багийн бүрэлдэхүүнд өөрчлөлт орж, П.Орхоны оронд олимпийн хүрэл медальт, дэлхийн аварга С.Батцэцэгийг явуулахаар болжээ.

П.Орхон энэ оны улсын аварга шалгаруулах тэмцээнд түрүүлснээс гадна ДАШТ-д явах сонгон шалгаруулалтад С.Батцэцэгийг ялж эрхээ баталгаажуулаад байсан юм.

Энэ жил 25 настай П.Орхон “Алдар” спорт хорооны дасгалжуулагч Ц.Хосбаярын шавь юм. Тэрбээр 2016 оны нэгдүгээр сард ОХУ-ын Красноярск хотод болсон олимпийн хошой аварга, дэлхийн аварга И.Ярыгиний нэрэмжит чөлөөт бөхийн “Алтан гранпри” тэмцээнд 58 кг-д түрүүлсэн юм. Энэ тэмцээний финалд олимпийн гурав, дэлхийн 10 удаагийн аварга Японы алдарт бөх Каори Ичог ялж, тухайн үед томоохон дуулианыг дэлхийн спортын түүхэнд бичсэн билээ.

П.Орхон 2016 оны хоёрдугаар сард нь Какахстанд болсон тэмцээнд олимпийн эрхийг авч, Риогийн олимпийн наадамд барилдсан билээ. Өнгөрсөн онд Францын Парист болсон ДАШТ-д 63 кг-д түрүүлж, дэлхийн аварга цолыг хүртэж, улмаар гавьяат тамирчин цол хүртсэн юм.


Энэ мэдээ таалагдаж байвал:


  • ЭЭРАА · [103.10.21.116] · 2018/10/06

    Хайран сайхан охин. Нх орны нэрийн хуудас минь. Одоо энэ чигээрээ спортыг орхих байх даа харамсалтай


  • санал · [202.179.26.142] · 2018/10/04

    мэдэгдэхгүйгэр хорлох гээд өгчихдөг юмуу хаашаа юм бэ хайран сайхан таирчныг баллаад хаячих юмаа гэвч залуу байна цаанань зөндөөн боломж байнаа орхоон сайн санаатай бхгүй бл болохгүйнээ сургамж ав өөр яахав ...


  • Яахаараа хориотой эмнээс сэргийлж чадахгүй байна вэ? Яахаараа япон, солонгосын тамирчид ДОПИНГээс хөндий байж чадаад байна вэ? Монголын бөхийн холбоод, дасгалжуулагч нарын хариуцлага муу байна даа