Хакүхо М.Даваажаргал буюу Мияагино оякатагийн дэвжээ хүчээр хаагдаж, Исэгахама дэвжээтэй нэгдсэн билээ. Тэгвэл сүмо сонирхогчид энэхүү явдлыг 2000-аад оны эхэн үеийн Реал Мадрид, 2010-аад оны Майами Хит, 2024 оны Лос Анжелес Доджерстэй харьцуулан супер баг бий боллоо гэж үзэж байна.

Исэгахама дэвжээний багшаар Исэгахама Сэйяа буюу ёкозүна Асахифүжи, дасгалжуулагчдаар Татэяама Ёшиюүки, Мияагино Шо буюу ёкозүна Хакүхо, Магаки Ёшито нар ажиллаж байна. Хоёр ёкозүна нэг дэвжээнд багш, дасгалжуулагчаар ажиллана гэдэг ховор хувь заяа гэнэ.

Харин дээд зиндаанд барилддаг бөхчүүдийг дурдвал ёкозүна Тэрүнофүжи Г.Ган-Эрдэнэ, Атамифүжи Сакүтаро, Мидорифүжи Казүнари, Нишикифүжи Рюүсэй, Такэрүфүжи Микияа нар бий. Мөн удахгүй дээд зиндаанд дэвшиж, сайн барилдана гэгдэж буй Такарафүжи Дайсүкэ, Хакүохо Тэцүяа нар Исэгахама дэвжээнийх билээ.

Саяхан л дэвжээн дээр өрсөлдөгчийн дүрээр таарч байсан ёкозүна Хакүхо болон ёкозүна Тэрүнофүжи хоёр одоо багш, шавь боллоо.

Сүмо сонирхогчид Исэгахама дэвжээг ирэх башёд хүчтэй оролцоно гэж үзэж байна. Хамгийн сүүлд 1999 онд Фүтагояама дэвжээ ийм хүчирхэг бүрэлдэхүүнтэй байжээ. Тухайн үед тус дэвжээнд хоёр ёкозүна, нэг озэки, нэг сэкивакэ, нэг комүсүби цолтон харьяалагдаж байв. Харин Мүсашигава дэвжээнд нэг ёкозүна, гурван озэки, цөөнгүй маэгаширагийн бөхчүүд байсан аж.

Хэргийг эргэн сануулахад, Мияагино дэвжээний бөх, Хакүхогийн шавь Хокүсэйхо Э.Даваанинж дэвжээнийхээ залуу бөхчүүдийг дээрэлхэж, дээрэмддэг байсан нь ил болж, улмаар тэрбээр зодог тайлаад зогсохгүй дэвжээг нь хүчээр хаасан түүхтэй.