Төр, хувийн хэвшлийн зөвлөлдөх уулзалт Төрийн ордонд болж байна. Уулзалтаар Засгийн газар “Гурван тулгуурт хөгжлийн бодлого”, “Татварын хуулийн шинэчлэл” зэрэг хөгжлийн бодлого, шийдвэр, цаашдын чиг хандлага, хэрэгжүүлэхээр төлөвлөсөн ажлаа танилцуулсан юм.
Энэ үеэр Байгаль орчин, аялал жуулчлалын сайд Н.Цэрэнбатаас зарим зүйлийг тодрууллаа.
-“Гурван тулгуурт хөгжлийн бодлого”-ын нэг нь аялал жуулчлалын салбар гэлээ. Энэ хүрээнд ямар ажил хийхээр төлөвлөж байна вэ?
-Төрийнхөө бодлогод уялдуулж аялал жуулчлалын салбарыг хөгжүүлнэ. Иймээс ажлын байр бий болгох хэрэгтэй. Одоохондоо дотооддоо байгаа хүнс болон бүх төрлийн бүтээгдэхүүнийг экспортлох олон улсын шаардлага хангах боломж муу байна. Гэхдээ жуулчдад бүтээгдэхүүнээ зарах боломж үүсч байна гэж харж байгаа. Гол нь, дэд бүтцээ сайжруулах явдал. Ингэснээр агаарын болон бусад салбарт хөрөнгө нэмсэн тохиолдолд аялал жуулчлалаар ирэх хүнийхээ тоог нэмэх бүрэн боломжтой. Бидэнд нэг сая жуулчин хүлээж авах боломж бий.
-Нэг сая жуулчин хүлээж авахын тулд хамгийн түрүүнд ямар ажил хийх вэ?
-Мэдээж агаарын тээврийн хүчин чадлыг нэмэх ёстой. Зөвхөн үндэсний агаарын тээвэрлэгчийг хүлээгээд боломжоо алдаад байх уу, эсвэл өөр агаарын тээврийн компаниудыг оруулж ирэх үү гэдгийг бодох хэрэгтэй. Ер нь жуулчдыг авч ирэх даацаа нэмэх шаардлагатай гэж харж байгаа. Мөн аялал жуулчлалын бүтээгдэхүүнүүдээ тус тусдаа биш нэгдсэн бодлогоор хөгжүүлэх хэрэгтэй. Манай яам Монгол Улсын аялал жуулчлалын маршрутыг гаргачихсан ажлын хэсэг ажиллаж байна. Ирэх дөрөвдүгээр сардаа багтааж аялал жуулчлалын маршрутаа батална. Энэ нь аж ахуйн нэгжүүдэд том боломж юм. Тухайн бүс нутагт ажлын байр бий болно. Түүнчлэн аймаг, орон нутгийн замыг авто зам болгох шаардлагатай. Ингэж байж Зүүн Өмнөд Азиас жуулчид авах боломж бүрдэнэ.
-Аялал жуулчлалаас орж ирж байгаа мөнгө эдийн засгийн хэдэн хувийг эзэлж байна вэ?
-Одоогоор тав орчим хувийг л эзэлж байна. Тиймээс нэг сая жуулчин хүлээн авч нэг тэрбум ам.доллар оруулдаг болохоор зорьж байна. Энэ салбарыг дагаж хүнсний салбар хөгжинө. Харахад хэдэн хүний оролцоо мэт боловч үр дүн нь бүх хүнд боломж үүсгэдгээрээ энэ салбар давуу талтай. Тиймээс бид дэмжинэ. Энэ удаагийн хэлэлцүүлгийн уриа нь хүчээ нэгтгэх. Тус тусдаа биш нэгдсэн нэг бодлогоор хөдлөх цаг нь болсон.