Хятадын компанид 50 га газар хүлэмжийн тариалангийн зориулалтаар эзэмшүүлэх гэж байна гэсэн мэдээлэл явж байгаа. Энэ асуудал болон махны хангамж нийлүүлэлтийн талаар ХХААХҮ-ийн сайд Ч.Улаан мэдээлэл хийлээ.
Нийслэлийн хүн амын махны хангамжийг тогтворжуулах, нийлүүлэлтийн улирлын хамаарлыг бууруулах зорилгоор арилжааны банкны эх үүсвэрээр мал, мах бэлтгэсэн махны үйлдвэрүүдэд зээлийн хүүгийн хөнгөлөлт үзүүлэх замаар мах нөөцөлж, хөнгөлөлттэй үнээр худалдан борлуулж байгааг хэллээ.
НӨӨЦИЙН МАХЫГ 16-45 ХУВИАР ХЯМД БОРЛУУЛЖ БАЙНА
Сайд мэдээллийнхээ эхэнд махны хангамж нийлүүлэлт болон, хүрэлцээ хангамжийг сайжруулахаар авч байгаа арга хэмжээнийхээ талаар мэдээлэв.
Арилжааны банкны шалгуурт тэнцсэн “Баатарууд Тэнгэр”, “Дархан меат фүүдс”, “Сүхбаатар мах маркет” ХХК-иуд нийт 4.0 мянган тн мах бэлтгэснийг нийслэлийн хүн амын хүнсний хэрэгцээнд 2019 оны 4 дүгээр сарын 15-ны өдрөөс нийлүүлсэн байна. 2019 оны 5 дугаар сарын 29-ны өдрийн байдлаар нийт 2,820 тн мах буюу бэлтгэсэн нөөцийн 70.5 хувийг борлуулжээ.
Нөөцийн махыг Нийслэлийн 8 дүүрэгт хүнсний 137 дэлгүүрээр дамжуулан үхрийн ястай махыг 7,200 төг/кг, хонины ястай махыг 6,000 төг/кг, ямааны ястай махыг 5,500 төг/кг үнээр худалдаалж байгаа нь зах зээл дэх жижиглэнгийн үнээс 16-45 хувиар хямд байгаа аж.
Одоогоор махны үнэ Үндэсний статистикийн газрын 5 дугаар сарын 22-ны өдрийн мэдээгээр өмнөх 7 хоногийн үнэтэй харьцуулахад 62-136 төгрөгөөр буюу 0.5-1.27 хувиар буурсан гэх мэдээ байна.
Яамнаас хийсэн 2019 оны 5 дугаар сарын 29-ний өдрийн тандалт судалгаагаар "Хүчит шонхор" захад:
-Хонины мах бөөний үнээр 7,000-7,800 төг/кг, жижиглэнгийн үнээр 8,000-9,500 төг/кг
-Ямааны мах бөөний үнээр 6,500-7,000 төг/кг, жижиглэнгийн үнээр 7,700-9,500 төг/кг
-Үхрийн мах бөөний үнээр 7,500-9,000 төг/кг, жижиглэнгийн үнээр 10,000-12,000 төг/кг
-Адууны мах бөөний үнээр 6,800-7,200 төг/кг, жижиглэнгийн үнээр 8,500-9,000 төг/кг үнэтэй байгаа аж.
Энэ сарын 29-ний өдрийн байдлаар орон нутгаас Нийслэл хот руу нийт 67.1 тн мах, 553 толгой амьд мал нийлүүлжээ.
50 ГА ГЭДЭГ АСУУДАЛ БИДЭНД АЛБАН ЁСООР ТАВИГДААГҮЙ, ИЙМ МЭДЭЭЛЭЛ БАЙХГҮЙ
БНХАУ-ын компани Монгол Улсад 50 га газарт хүлэмжийн аж ахуй эрхлэх гэж байгаа тухай мэдээлэлд Ч.Улаан сайд тайлбар өглөө.
ХХААХҮ-ийн сайд Ч.Улаан "БНХАУ-ын Тяньжин хоттой Нийслэл хотын хамтын ажиллагааны хүрээнд өвлийн хүлэмжийн аж ахуй байгуулж ажиллах тухай санал яригдаж, судлагдаж яваа. Бидэнд байгаа албан ёсны мэдээгээр 0.3 гад нь сургалт, туршилтын хүлэмж, 5 гад нь өвлийн хүлэмж байгуулах асуудал судлагдаж байгаа. 50 га гэдэг асуудал бидэнд албан ёсоор тавигдаагүй, ийм мэдээлэл байхгүй" гэв.
Түүнчлэн хөнгөлөлттэй зээлд хүлэмжийн аж ахуй эрхэлдэг манай аж ахуйн нэгжүүд хамрагдах боломжтой болсон. Өвлийн хүлэмжийн цахилгаан халаалтын зардлыг төрөөс хөнгөлөх тухай хөөцөлдөж байгаа гэдгийг мөн мэдээлсэн юм.