Эрүүл мэндийн яамнаас ээлжит мэдээллээ хийв. ХӨСҮТ-ийн дарга Д.Нямхүү “Сүүлийн гурван хоногийн хугацаанд нийт 1823 хүнд шинжилгээ хийхэд нэг хүнээс коронавирус илэрлээ. Тодруулбал, энэ 4-нд Нурсултан-Улаанбаатар чиглэлийн онгоцоор ирсэн 19 настай эмэгтэйгээс илэрсэн.
Мөн Алтанбулагийн боомтоор орж ирсэн 70 жолоочид шинжилгээ хийхэд коронавирус илрээгүй. Нийт батлагдсан тохиолдол 314 болж, 307 хүн нь эдгэрээд байна.
ХӨСҮТ-д өдгөө 7 хүн эмчлүүлж байна. Таван хүний биеийн байдал хөнгөн, хоёр хүн хүндэвтэр байна.
Улирлын томуугийн вакциныг аравдугаар сарын 1-нээс 10-ны хооронд зохион байгуулж байна. Улирлын томуугийн дарамт коронавирусийн дарамттай яг ижилхэн. Олон хүмүүс өвчилдөг, эмнэлгийн ачаалал маш их нэмэгддэг. Эрүүл мэндийн салбарт жил бүр тохиолддог гамшиг гэсэн үг. Үүнээс сэргийлэх хамгийн найдвартай, чухал нь вакцинжуулалт юм. Тиймээс иргэдийн вакциндаа идэвхтэй хамрагдахыг анхааруулж байна” гэв.
