Монголбанкны ерөнхийлөгч асан Н.Золжаргалыг өчигдөр орой АТГ-аас баривчлан ШШГЕГ-ын Цагдан хорих 461 дүгээр ангид хориод байгаа билээ.

Улмаар Г.Золжаргалын хэрэгт УИХ-ын гишүүн Б.Жавхланг холбогдуулан шалгаж эхэлсэн тухай мэдээлэл цацагдсан. Учир нь Г.Золжаргал Монгол банкны ерөнхийлөгчөөр ажиллаж байх үед Б.Жавхлан нь Монголбанкны тэргүүн дэд ерөнхийлөгчөөр ажиллаж байсан нэгэн юм.

Тэгвэл УИХ-ын гишүүн Б.Жавхлан үүсээд байгааа асуудлаар хэвлэлд тайлбар өглөө. Тэрбээр ярихдаа, “Шалгаж байгаа асуудлаар надад мэдэгдэж байгаа зүйл алга байна. Өнөөдрийн байдлаар надад хаанаас ч хандаагүй байна. Шалгалтын асуудлаар хууль хяналтын байгууллагад тайлбар  өгч шалгуулахад бэлэн байна. Би Монголбанкинд 20 гаруй жил ажилласан. Сүүлийн 6 жил хоёр ерөнхийлөгчийн дэргэд ажилласан. Үе үеийн ерөнхийлөгч нар ямар бодлого зөв гэж үзнэ тэр бодлогоо гаргаад хэрэгжүүлээд явдаг.

Бондын зарцуулалт бол Засгийн газартай холбоотой зүйл. Монголбанкин дээр Үнэ тогтворжуулах хөтөлбөрийн санхүүжилт, тухайн үеийн Засгийн газрын хэрэгжүүлж байсан “Сайн” нэртэй олон хөтөлбөрүүд дээр асуудлууд яригдаж байгаа. Энэ асуудал УИХ дээр маш дэлгэрэнгүйгээр яригдсан шүү дээ" гэх мэдээллийг өглөө.