Парис хотын Гревин Музейд алдартнуудын лааны тосон баримлууд байдаг. Тэдгээрийн дотор ОХУ-ын ерөнхийлөгч Владимир Путиний баримал байдаг юм байна.

Гэтэл өнгөрсөн амралтын өдрүүдэд Украинд болж буй дайнтай холбоотойгоор үзэгчдийн зүгээс Путиний барималд халдах, гэмтээх явдал хэд хэдэн удаа гарчээ.

Тиймээс музейн захиргаа Оросын ерөнхийлөгчийн баримлыг буулгаж, хураахаас өөр аргагүй болсон байна.

“Өнөөдөр бид түүнтэй адил хүний баримлыг үзүүлэх боломжгүй болжээ. Манай музей түүхэндээ анх удаа өнөөдөр өрнөж буй үйл явдалтай холбоотойгоор хэн нэгний баримлыг буулгахад хүрч байна” гэж музейн захирал Ив Деломо орон нутгийн хэвлэлд ярьжээ.

Музейн ажилтнууд өдөр бүр Путиний баримлын эвдэж сүйтгэсэн нүүр, үсийг засаж янзлаад байж чадахгүй тул хураахаас өөр аргагүй болсныг тэр тайлбарласан байна.

Путиний баримал АНУ-ын ерөнхийлөгч Жо Байден, Хятадын ерөнхийлөгч Ши Жиньпин нарын баримлын дунд байрлаж байжээ.

Деломо одоо энэ зайд Украины ерөнхийлөгч Володимир Зеленскийн баримлыг бүтээж байрлуулах талаар бодож байгаа гэнэ.

“Магадгүй оронд нь ерөнхийлөгч Зеленскийн баримлыг байрлуулж болох юм. Өнөөдөр тэр эх орноо хамгаалагч баатар болоод байна шүү дээ” гэж тэр ярьсан байна.

Өмнө нь 2014 онд Гревин Музей дэх Путиний баримал халдлагад өртөж байжээ. Тэр үед Орос улс Крымийн хойгийг Украинаас салган өөртөө нэгтгэж байсан юм.

Эх сурвалж: Reuters