Оросын газрын тос, байгалийн хийн импортод хориг тавьж байгаагаа Мягмар гарагт АНУ-ын ерөнхийлөгч Жо Байден зарлалаа.

Ингэснээр Украины хямралтай холбоотой Өрнөдийн орнуудын ОХУ-ын эсрэг авч хэрэгжүүлж буй эдийн засгийн хориг арга хэмжээ эрчимжиж байна.

АНУ-ын холбоотнуудаас Их Британи энэ оны сүүлээр Оросын импортод хориг тавихаа мэдэгджээ. Харин Оросын байгалийн хийгээс гүнзгий хамааралтай Европын Холбооны улсууд энэ удаагийн хоригт нэгдээгүй байна.

“Америкчууд Украины ард түмнийг дэмжиж, Путиний дайнд татаас төлөхгүй гэдгээ тодорхой харууллаа” гэж Жо Байден хэлжээ.

Тэрбээр энэхүү шийдвэрээ Европын холбоотнуудтайгаа зөвлөлдсөний эцэст гаргаснаа бас тайлбарласан байна.

Их Британийн ерөнхий сайд Борис Жонсон 2022 оны сүүлээр Оросын газрын тос болон холбогдох бүтээгдэхүүний импортод хориг тавихаа амлажээ. Тэрбээр өөрийнх нь улсын эрчим хүчний салбар хоригийг хэрэгжүүлэхэд хугацаа шаардлагатай байгааг мэдэгджээ.

Германы канцлер Олаф Шольц ийм хоригийг нэг өдрийн дотор гаргах боломж Европын орнуудад байхгүйг хэлсэн бол Брюсселийн эрх баригчид энэ онд багтаан Оросын байгалийн хийн импортыг гуравны хоёроор бууруулах зорилго тавьж байгаагаа мэдэгдсэн байна.

Өнөөдрийг хүртэл Өрнөдийн орнууд Оросын банк, санхүүгийн системд олон төрлийн хориг арга хэмжээ зарласан боловч газрын тос, байгалийн хийн импортод гар хүрээгүй байсан юм.

Энэ нь зөвхөн Оросын талыг хохироогоод зогсохгүй өөрсдийнх нь эдийн засагт ч дарамт учруулах шийдвэр байлаа.

Москвагийн эрх баригчдын хувьд газрын тос, байгалийн хийн салбар бол экспортын орлогынх нь гол эх үүсвэр юм.

АНУ-ын тал өөрт ирэх ачааллыг бууруулахын тулд Венесуэлийн газрын тосны хоригийг чөлөөлөх, Саудын Арабын олборлолтыг нэмэгдүүлэх талаар ярилцаж байгааг албаны эх сурвалж мэдээлжээ.

Мөн өөрийн стратегийн нөөцөөс газрын тос зах зээлд нийлүүлэхээр төлөвлөсөн байна.

“Европын холбоотнууд маань энэ хоригт нэгдэх боломжгүй байгааг бид ойлгож байна. АНУ-ын дотоодын газрын тосны үйлдвэрлэл бүх Европынхоос ч хол илүү. Тиймээс бид л зөвхөн ийм арга хэмжээ авч чадна” гэж Байден мэдэгджээ.

Гэхдээ тэр Европын холбоотнуудтайгаа Оросын эрчим хүчний нийлүүлэлтээс хамаарлаа багасгах урт хугацааны төлөвлөгөөн дээр хамтран ажиллаж байгаагаа хэлсэн байна.

2021 онд АНУ өдөр бүр 672,000 баррель газрын тос ОХУ-аас импортолжээ.

Энэ нь тус улсын нийт хэрэгцээний 8 орчим хувь юм.

Үлдсэн хэсгийг дотооддоо үйлдвэрлэх, Канад, Мексик, Саудын Арабаас импортлох замаар бүрдүүлдэг байна.

Харьцуулбал Европын улсууд өдөрт бараг 4 сая баррель газрын тос ОХУ-аас импортолдог ажээ.

Эх сурвалж: Associated Press