Өчигдөр буюу Пүрэв гарагт Туркийн Анталья хотод Орос, Украины гадаад хэргийн сайд нар уулзсан ч ямар нэг ахиц дэвшил гарсангүй.
ОХУ-ын гадаад хэргийн сайд Сергей Лавров гал зогсоох ганцхан нөхцөл нь Украины зэвсэгт хүчин бууж өгөх гэсэн хатуу шаардлагаа давтан илэрхийлснийг Украины гадаад хэргийн сайд Дмитро Кулеба уулзалтын дараа хэлсэн байна.
Лавров бас тус улсын Украинд явуулж буй “цэргийн тусгай ажиллагаа” төлөвлөгөөний дагуу хэрэгжиж байгааг мэдэгджээ.
ОХУ-ын цэрэг Украинд халдан довтлоод хагас сарын хугацаа өнгөрөөд байна. Энэ хугацаанд Украинаас хөрш орнууд руугаа дүрвэсэн хүний тоо 2.3 сая хүрээд байгаа.
Лавров, Кулеба нарын уулзалтын өмнөх өдөр Оросын агаарын довтолгоонд Мариуполь хотын эх, хүүхдийн эмнэлэг өртөж, гурван хүн алагдсаны нэг нь хүүхэд байсан юм.
Лавров өчигдөр хэлэхдээ цохилтод өртсөн барилга эмнэлгийн зориулалтаар ашиглагдахаа нэгэнт больж, дотор нь Украины үндсэрхэг үзэлтнүүдийн батальон байрлаж байсан гэжээ.
Өнгөрсөн хугацаанд Орос, Украины засгийн газрын төлөөлөгчид Беларусийн нутагт гурван удаа уулзахдаа энгийн иргэдийг дайны талбараас нүүлгэх хүмүүнлэгийн коридор гаргахаар ярилцсан ч бүрэн хэрэгжиж чадахгүй байгаа юм.
Үүний улмаас олон хоног бүслэлтэд байгаа 400,000 орчим оршин суугчтай Мариуполь хотод хүмүүнлэгийн гамшиг нүүрлээд байна.
“Украин улс бууж өгч байгаагүй, бууж өгөөгүй, бууж өгөхгүй гэдгийг би давтан хэлмээр байна” гэж мэдэгдсэн Кулеба яриа хэлэлцээг цааш үргэлжлүүлэх хүсэлтэйгээ илэрхийлжээ.
Украины тал зэвсгээ хаян бууж өгөх, эвсэлд нэгдэхгүй төвийг сахих амлалт өгвөл гал зогсоох боломжтойг Лавров мэдэгдээд Киевээс хариу хүлээж байгаагаа илэрхийлсэн байна.
Тэрбээр Украинд зэвсэг нийлүүлж, мөргөлдөөнийг улам хурцатгаж байгаа Өрнөдийн орнуудыг энэ үеэр шүүмжилжээ.
Лавров бас Орос улс Өрнөдийн эдийн засгийн хоригийг даваад гарах чадвартай болсныг уулзалтын дараа сэтгүүлчдэд мэдэгдсэн байна.
Эх сурвалж: BBC