Монголын анхны хамгийн өндөр бооцоотой тулаан буюу 600 сая төгрөгийн бооцоотой гавьяат тамирчин Э.Цэндбаатар, Холимог тулаанч З.Шинэчагтага тулаан маргааш болно.
Үүнтэй холбоотойгоор тамирчид өнөөдөр жингээ үзлээ. Тэд өнгөрсөн хоёр сарын хугацаанд хувийн бэлтгэлээ хангасан бөгөөд 70 килограммын жинд өрсөлдөх юм.
Түүнчлэн дээрх хоёр тулаанчаас гадна маргааш:
- Мэргэжлийн боксын төрлөөр тамирчин Э.Сүхбат болон Э.Баярсайхан 57.5 кг-ын жинд,
- Холимог тулааны төрлөөр Г.Сайханбилэг болон Ц.Отгонбаяр нар 61 кг-ын жинд нар өрсөлдөхөөр жиндээ орлоо.
Жингээ үзсэний дараа З.Шинэчагтага "Маргааш рингэн дээрээ уулзах өрсөлдөгчдөө ямартай ч амжилт хүсье. Рингээ өнөөдөр харчихсан чинь догдолж, харизм хөдлөөд хэлэх үг олдохгүй байна” гэлээ.
Харин Э.Цэндбаатар “Бид нийт найман үе тоглоно. Надад бодсон юм бий. Мөн жиндээ орсон өрсөлдөгчдөө баяр хүргэе дээ. Рингэн дээрээ учраа олно, өөр хэлэх үг байхгүй” гэлээ.
Мөн тэрбээр “Надад хожигдох эрх байхгүй, тултал нь үзнэ. Харин өрсөлдөгч маань надад хожигдвол дахин тулаанд намайг дуудах эрх нь бий. Тэгвэл хүлээж авна. Бооцооныхоо тодорхой хувийг сайн үйлсийн аянд зарцуулна. Тулаан болоход ганцхан хоног үлдсэн. Би өрсөлдөгчөө басахгүй байгаа. Гэхдээ маш сайн сэтгэл зүйгээ бэлдэж, бүхнээ дайчилна.
Бидний гадуурх харилцаа хэвийн, энэ бол спорт. Харин спорт гэдэг бол тэр чигээрээ өрсөлдөөн. Маргааш бид хэн нь илүүгээ үзнэ” хэмээн сэтгүүлчдийн асуултад хариулсан юм.
Тулаан маргааш орой Бөхийн өргөөнд болно.
