Дэлхийн улс орнуудын зуу зуун төрийн тэргүүнүүд, язгууртнууд Даваа гарагт Лондон хотын Уэстминстер Аббей ордонд Их Британийн хатан хаан Хоёрдугаар Элизабеттай салах ёс гүйцэтгэлээ.

Их Британи улс хамгийн сүүлд 1965 онд ерөнхий сайд агсан Уинстон Черчилльд төрийн оршуулга зохион байгуулж байсан бол бараг 60 орчим жилийн дараа 70 жил төр барьсан хатан хаандаа ийн хүндэтгэл үзүүлжээ.

Элизабет хатан хаан есдүгээр сарын 8-ны өдөр Шотландын Балморал шилтгээнд 96 насандаа таалал төгссөн юм.

Тэрбээр хөдөлгөөний бэрхшээлтэй болсон шалтгаанаар сүүлийн саруудад олон нийтийн арга хэмжээнүүдэд оролцохоо болиод байв.

1952 онд хаан ширээнд заларч байсан тэр төр барьсан хугацаагаар Их Британийн түүхэнд (70 жил) нэгдүгээрт бичигдэх, дэлхийн түүхэнд Францын XIV Луй хааны дараа (72 жил) хоёрдугаарт бичигдэх төрийн тэргүүн болж байгаа юм.

Нас барсных нь дараа хатан хаантай салах ёс гүйцэтгэх үйл ажиллагаа 10 өдөр үргэлжилсэн бөгөөд оршуулснаас нь хойш 10 хоногийн дараа Британи даяар гашуудлын хугацаа дуусах юм байна.

Төрийн оршуулгын ёслолыг телевизээр Их Британи даяар шууд дамжуулахад 32 сая орчим хүн үзсэн нь тус улсын түүхэнд дээд амжилт болжээ.

Оршуулгын ёслолд Орос, Сири, Афганистан, Беларусь, Мьянмар, Венесуэлийн удирдагчдыг уриагүй байна.

Их Британийн зарим консерватив улс төрчид хүний эрхийн зөрчилтэй холбоотойгоор Хятад улсын урилгыг цуцлахыг уриалж байсан ч тус улсын дэд ерөнхийлөгч Ван Чишань оролцжээ. Харин Умард Солонгос улс элчин сайдын хэмжээнд төлөөлөгчөө оролцуулсан байна.

Хатан хааны оршуулгын ёслолд бас Япон, Бутан, Монако, Бельги, Дани, Швед, Испани зэрэг улсуудын хаад, язгууртнууд оролцсон юм.

Хатан хааны шарилыг Гэгээн Жоржийн сүмд, аав, ээж, дүү гүнж Маргарет болон нөхөр хунтайж Филип нарынх нь булшны дэргэд зэрэгцүүлэн оршуулжээ.

Эх сурвалж: BBC, The Guardian