Эрдэнэбүрэнгийн УЦС Увс аймгийн Өмнөговь, Ховд аймгийн Мянгад, Эрдэнэбүрэн, Баяннуур сумыг хамран баригдах гэж буйтай холбогдуулан Увс аймгийн иргэд өнгөрсөн даваа гаригт эсэргүүцэл үзүүлэв. Үүнтэй холбогдуулан Эрдэнэбүрэн УЦС төслийн зохицуулагч Ч.Гантулгаас иргэдэд олгох гэж буй мөнгөн олговрын талаар тодрууллаа.

Тэрээр “2019 оны Засгийн газрын 357 дугаар тогтоолоор “Эрдэнэбүрэнгийн УЦС-ын төсөл хэрэгжүүлэх 28 мянган га талбайг улсын тусгай хэрэгцээнд авсан. 2019 оны захирамж гарахаас өмнө тухайн нөлөөллийн бүсэд 270 өрх буюу 1241 иргэн бүртгэгдсэн юм. Энэ тооллогын хавар тав болон зургадугаар сард дахин хийж гаргасан. 2022 оны дөрөвдүгээр сард Засгийн газраас тэдгээр иргэдэд мөнгө олгохоор шийдвэр гаргасан байдаг. Төр амласандаа хүрч, ажлаа үргэлжлүүлж байна. Тиймээс бүртгэгдсэн 270 өрхийн 1240 иргэнд 15.2 сая төгрөгийг тус бүрд нь нөхөн олговор олгохоор болсон. Ингэхдээ үл хөдлөхийн үнэлгээний тухай хуулиар хөндлөнгийн үнэлгээг хийж гаргасан. Нөлөөллийн үнэлгээн дэх дүнг гэрээ байгуулан олгож эхэлж байна.

Баян-Өлгийн аймгийн 145 өрх, Увс аймгийн 125 өрх үүнд багтсан. БОННҮ-ий дагуу 2022-2024 онуудад тус айлуудыг нүүлгэх төлөвлөгөө гаргасан. Тухайн сумдын малчдын зэргэлдээх сумд руу нүүх асуудлыг ярьж байгаа. Тухайн жилдээ нүүж байгаа иргэдийн нөхөн олговор олгогдоод явна. Энэ мөнгөн хөрөнгийг төсөвт суулгасан” гэв.